ఏపీ హోంమంత్రికి ఉద్వాసన తప్పదా?

Posted: 05/06/2017 02:47 PM IST

తెలుగుదేశం పార్టీ రాష్ట్ర అధ్యక్ష పదవి కళా వెంకట్రావు మంత్రి వర్గంలో చేరిపోవటంతో ఇప్పటికే ఖాళీ అయిపోయింది. మహానాడు సమీపిస్తుండటంతో ఈ దశలో కొత్త ప్రెసిడెంట్ ఎవరన్న దానిపై చర్చ మొదలైంది. సీనియర్ ఎమ్మెల్యే, వైసీపీ నుంచి టీడీపీ కి వలస వచ్చిన జ్యోతుల నెహ్రూకు కేబినెట్ పోస్టు పదవి దక్కే అవకాశం ఉండటంతో... ఏకంగా డిప్యూటీ సీఎం, హోం మంత్రి చినరాజప్పకే ఉద్వాసన తప్పదన్న వార్తలు చక్కర్లు కొడుతున్నాయి.

సాధారణంగా టీడీపీ పార్టీ పదవిని కాపు కట్టబెట్టడం కొన్నాళ్ల నుంచి సాగుతూ వస్తోంది. దీంతో ఆ సామాజిక వర్గానికే ఇద్దామన్న ఆలోచనలో ఉన్న చంద్రబాబు చినరాజప్ప కన్నా బెటర్ ఆప్షన్ లేదన్న ఓ నిర్ణయానికి వచ్చేశాడని, మహానాడు వేదికగా ఈ ప్రకటన కూడా జరగబోతుందని అంతర్గతంగా నేతలు చర్చించుకుంటున్నారు. ఇప్పటికే ఉన్న అసంతృప్తత నేతలకు.. నెహ్రూకు మంత్రి పదవి ఇస్తే ఇంకా గనుక రగిలిపోయి పార్టీ నుంచి బయటకు వెళ్లే ఆలోచన చేస్తారని కీలక నేతలు ఆందోళన చేస్తున్నారు.

ఈ అంశాలను పక్కనబెడితే కీలకమైన హోం శాఖ నుంచి తప్పుకునేందుకు చిన్న రాజప్ప సిద్ధంగా ఉంటాడా? అన్న డౌట్లు మొదలవుతున్నాయి. కానీ, పార్టీకి వీరవిధేయుడిగా ఉంటూ.. తన ఆదేశాలను పాటించే రాజప్పకు ఎట్టి పరిస్థితుల్లో బాబు ద్రోహం చేయడనే కొందరు భావిస్తున్నారు. ఒకవేళ అదే జరిగినా పదవి త్యాగం చేసేందుకు రాజప్ప సిద్ధంగా ఉన్నాడన్నది మరో టాక్. పరిస్థితులు తారు మారు అయ్యే సూచనలు గనుక ఉంటే ఆ పదవిని దళిత నేత అయిన వర్ల రామయ్యకు కట్టబెట్టాలన్న ప్రతిపాదన కూడా రెడీ ఉందంట. మే 27, 28 తేదీల్లో ఏం జరగబోతుందన్న దానిపై అంతా ఆసక్తిగా ఎదురు చూస్తున్నారు.