కాంగ్రెస్ కు అమరావతి ఆహ్వానం అందేనా..?

Posted: 10/17/2015 09:58 AM IST

ఏపిలో కాంగ్రెస్ పార్టీ పరిస్థితి ఎలా ఉంది... అని ఎవరైనా ప్రశ్నిస్తే గుక్కతిప్పుకోకుండా ఛండాలంగా ఉందనో... అస్సలు బాగోలేదనో.. చెప్పుకోవడానికి కూడా లేనంత ఉందనో సమాధానం చెబుతారు. ఉమ్మడి రాష్ట్రాన్ని విభజించిన పాపంతో గత ఎన్నికల్లో కనీసం పార్టీ నుండి నిలిచేందుకు కూడా అభ్యర్థులు లేకపోవడం దయనీయ పరిస్థితి. రాహుల్ గాంధీ, సోనియా గాంధీలు పర్యటించినా సభల్లో జనాలు కూడా కనిపించని పరిస్థితి. సరే గతం గతం... గడిచిపోయింది. మరి ఇప్పుడు కాంగ్రెస్ పార్టీ పరిస్థితి ఎలా ఉంది అంటే ఎవరికీ అర్థం కావడం లేదు. అయితే ఏపి రాజధాని అమరావతి అంకురార్పణకు ముహూర్తం దగ్గర పడుతోంది. మరి అమరావతి శంఖుస్థాపనలో కాంగ్రెస్ పార్టీకి ఎలాంటి అనుభవం ఎదురుకానుంది.

ఉమ్మడి రాష్ట్రాన్ని విభజించిన పాపం.. కాంగ్రెస్ పార్టీదే అంటూ అన్ని పక్షాలే ఏపిలో విసృతంగా ప్రచారం చేశాయి. ఇక ఏపి సిఎం నారా చంద్రబాబు నాయుడు అయితే కాంగ్రెస్ పార్టీ పేరంటేనే చిర్రెత్తిపోతారు. అన్నింటికి మూలకారణం సోనియాగాంధే అంటూ ఒంటి కాలి మీద లేస్తారు. మరి అమరావతి అద్భుత ఘట్టానికి కాంగ్రెస్ పార్టీ నాయకులను చంద్రబాబు నాయుడు పిలుస్తారా..? లేదా.? అన్నది అందరికి వస్తున్న ప్రశ్న. పైగా అందరి దృష్టి మోదీ మీద, కేసీఆర్ పైన, జగన్ ఆహ్వానం మీద ఉంది కానీ కాంగ్రెస్ పార్టీ నాయకుల గురించి మాత్రం ఎవరూ మాట్లాడటం లేదు. కాంగ్రెస్ నాయకులకు ఆహ్వానం అందుతుందా..? అందితే మాత్రం అమరావతి శంఖుస్థాపనకు ఎవరు వెళతారు అన్నది ప్రస్తుతానికి సమాదానం లేని ప్రశ్న. అయితే చంద్రబాబు నాయుడుకు కాంగ్రెస్ పార్ట నాయకులను ఆహ్వానించడం ఇష్టం లేదని ప్రచారం సాగుతోంది. ఏపికి అన్యాయం చేసిన కాంగ్రెస్ పార్టీ అధినేత్రి సోనియా గాంధీతో పాటు, ఎవరిని కూడా ఆహ్వానించకూడదు అని నిర్ణయం తీసుకున్నట్లు సమాచారం. మరి ఏం జరుగుతుందో చూడాలి.

*అభినవచారి*