లేలేత కమలాలలో కలకలం

Posted: 03/27/2014 08:31 AM IST

భారతీయ జనతా పార్టీ, తెలుగు దేశం పార్టీలు పొత్తులతో ఎన్నికలలో ముందుకెళ్తాయని ఆశపడి భాజపాలో చేరిన నాయకులకు ఆ పొత్తు ఒప్పందాలు కుదరక పోవటంతో ప్రతిరోజు ఉత్కంఠతో ఎదురు చూడటం, నిరాశ చెందటం జరుగుతోంది. 

సీమాంధ్రలో కాంగ్రెస్ పార్టీ లాగానే ఉంది భాజపా పరిస్థితి కూడా.  అందువలన తెదేపాతో పొత్తు ఉంటేనే గెలవటం సాధ్యమౌతుంది కాబట్టి కొత్తగా భాజపాలో చేరిన నాయకులు మనస్తాపం చెందుతున్నట్టుగా కనిపిస్తున్నారు.  తెదేపాతో పొత్తు ఉంటుందని నమ్మి ఎన్నికల కోసం ఇప్పటికే ఖర్చుపెట్టిన కొందరు నాయకులు భాజపా అధిష్టానానికి పొత్తు పెట్టుకోమని కోరుతూ వివిధ నాయకులతో సంప్రదింపులు చేస్తున్నారు.  భాజపా ఎక్కువ సీట్లను అడగటం వలనే సమస్య తలెత్తుతోందని అంటున్నారు.  భాజపాలోకి వచ్చి చేరే నాయకులనుబట్టి వారందిరినీ సంతృప్తి పరచటానికి ఎక్కువ సీట్లు అడిగే పక్షంలో తెదేపా అందుకు సిద్ధంగా లేదు.  పైగా భాజపా వ్యాఖ్యలతో తెదేపా మనసు నొప్పించినట్లుగా కూడా కనపడుతోంది.

తెదేపా తప్ప రాష్ట్రంలో భాజపాతో పొత్తుకి ఏ పార్టీ ముందుకొస్తోంది.  మిగతా పార్టీలు ఎన్నికల తర్వాత పొత్తు గురించి ఆలోచిస్తామంటున్నాయి కానీ తెదేపా మాత్రమే ఈవిషయంలో ముందుగా ముందుకొచ్చిందంటూ తెదేపా నాయకులు అంటున్నారు.  ఇక్కడ స్థానికంగా నెలకొన్న వాతావరణంలో ఏ విధంగా సీట్ల ఎడ్జెస్ట్ మెంట్లు చేసి ఎక్కడ భాజపాకి ఇవ్వాలన్న విషయాన్ని శోధించి శాస్త్రీయంగా ఆలోచించి తెదేపా చెప్తుంటే కాదు మాకు ఇన్ని కావాలి, ఇక్కడ కావాలి అంటూ భాజపా కోరటం సరికాదని తెదేపా నాయకులు, భాజపాలో చేరిన నాయకులు కూడా భావిస్తున్నారు. 

తెలంగాణాలో చూసుకున్నా, ఉద్యమం బాగా ఊపందుకుని ఉన్న సమయంలో కూడా తెదేపా వరంగల్ జిల్లా పరకాలలో ముప్ఫైవేల వోట్లకు పైగా మెజారిటీ సంపాదించిందని తెదేపా నాయకులంటున్నారు.

అయితే పొత్తు విషయంలో ఇంకా చర్చలు సాగుతూనేవున్నాయి.  పూర్తిగా తలుపులు మూసుకుపోలేదు కాబట్టి భాజపా నాయకులు మిణుకుమిణుకుమంటున్న చిన్న ఆశను ఇంకా కాపాడుకుంటూనేవున్నారు.

-శ్రీజ