గాంధీ సూక్తులు

Posted: 04/23/2013 03:10 PM IST

బలహీనుడికే క్షమాగుణం ఉండదు. శక్తివంతుడు క్షమించగలుగుతాడు- మహాత్మా గాంధీ.

నిజం చెప్పాలంటే, కోపం వచ్చేది ఎవరికి వారి మీదనే. ఎవరైనా అపవాదు వేసినా, అగౌరవపరచినా అప్పుడు వాళ్ళ మీద కోపం వచ్చినట్టు అనిపించినా నిజానికి ఎవరికి వారి మీదనే వస్తుంది కోపం. ఎవరైనా పొగిడితే వచ్చే సంతోషం తనమీద తనకి వచ్చే గర్వం వలన. అలాగే ఎవరైనా కించపరిస్తే తన సామర్ధ్యం మీద తనకి నమ్మకం లేకనే.

అందుకే నిజంగా శక్తి కలిగినవాడికి ఒకవేళ కోపం వచ్చినా అది ఎక్కువ సేపు ఉండదు.

ఎంత తప్పు చేసాడో తెలుసా నేను ఎప్పటికీ మర్చిపోలేను అంటుంటారు కొందరు. అది ఎంత మానసిక బలహీనతో చూడండి! మర్చిపోలేను అన్నది గొప్పతనమా? ఒకే విషయాన్ని మర్చిపోకుండా గుర్తుపెట్టుకుని మరీ బాధపడుతుంటాను అంటే అది వాళ్ళ ఇష్టం. వాళ్ళకున్న స్వేచ్ఛ.

ఏమీ చెయ్యలేకపోయాను లేదా ఆ సమయంలో నేను సరిగ్గా బదులివ్వలేదు అని అనుకున్నప్పుడు అది గతించిపోయింది, దాన్ని మార్చలేనిది కాబట్టి గుర్తుకొచ్చినప్పుడల్లా కోపం వస్తుంది. అందుకే సర్వసమర్థుడికి కోపం రాదు.

క్షమించగలగటం మానసికమైన ఎదుగుదల. పెద్దరికం పెత్తనంతోనో, వయసులో పెద్దవటం వలనో రాదు. క్షమించగలిగేవాడే పెద్దవాడు. అటువంటి పెద్ద మనసున్న వ్యక్తి దృష్టిలో తప్పులు చేసేది చిన్నవాళ్ళే కాబట్టి వాళ్ళని క్షమించటం పెద్దవాడిగా తన కర్తవ్యం అనిపిస్తుంది. ఎత్తుకున్న సమయంలో చిన్న పిల్లవాడు కాలితో కొడితే దానికి తప్పు పడతామా? వాడి మీద కక్ష్య పెంచుకుంటామా? అలాగే పెద్దరికం, పెద్ద మనసున్న వారు కూడా క్షమించగలుగుతారు.

పెద్ద అంటేనే శక్తివంతుడని అర్థం వస్తుంది కాబట్టి, శక్తివంతుడే క్షమించగలుగుతారని గాంధీ మహాత్ముడు చెప్పారు.

-శ్రీజ