Posted: 05/03/2013 04:14 PM IST

ప్రార్ధన అంటే ఉదయం లేచినప్పుడు తాళం చెవి, రాత్రి పడుకునేముందు తలుపు గడియ- మహాత్మా గాంధీ

ప్రార్ధన చేస్తూ ఉదయాన్ని ప్రారంభించండి, పడుకునే ముందు ప్రార్ధన చెయ్యండి అని చెప్పటాన్ని ఆ విధంగా సుందరమైన ఉపమానంతో వర్ణించారు గాంధీ మహాత్మ. 

మన హృదయకవాటాన్ని తెరవటానికి తాళం చెవి ప్రార్ధనే, అలాగే ప్రాపంచక విషయాలనుంచి వెనక్కి వచ్చి విశ్రాంతి తీసుకునే ముందు ఆ కవాటాన్ని మూసివేయటానికి ఉపయోగించే గడియ కూడా ప్రార్ధనే అంటారాయన.

లేవగానే ప్రార్ధనతో దైనందిన జీవితాన్ని ప్రారంభించటం, అలాగే ప్రార్ధనతోనే ఆ రోజుని ముగించటం చెయ్యమని ఆయన ఉద్దేశ్యం.  అప్పుడు రెండు ప్రార్థనల మధ్య కర్మాచరణ, రెండు ప్రార్ధనల మధ్య సుషుప్తి ఉంటాయి.  సుషుప్తి నుంచి కర్మాచరణకు దైవనామ స్మరణతో వెళ్ళమని, అలాగే కర్మాచరణను పూర్తి చేసిన తర్వాత తిరిగి సుషుప్తిలోకి దైవనామ స్మరణతోనే వెళ్ళమని ఆయన సూచిస్తున్నారు. 

అలా చెయ్యటం వలన మనం చేసే కార్యమంతా దైవకార్యమనే భావన కలిగి ఆ పనులన్నీ నిర్మలమైన మనసుతో చెయ్యటం జరుగుతుంది. 

దీన్నే పెద్దలు మరోలా చెప్పారు.  నిద్రలోకి పోయిన తర్వాత ఏమవుతుందో మనకి తెలియదు.  మన చేతుల్లో లేదు.  జాగృతిలో కూడా ఉండదు కానీ కనీసం మనకు తెలుస్తుంది.  కానీ నిద్రలో మనకు ఏమీ తెలియదు.  అంటే అది కూడా మృత్యువుతో సమానమే.  మనం నిద్రపోయామన్న విషయం కూడా లేచిన తర్వాతనే మనకు తెలుస్తుంది.  అందువలన లేవగానే మనలను పరిరక్షించిన పరమాత్మకు కృతజ్ఞతగానూ, పడుకునే ముందు మనలను రక్షించమని భగవంతుని వేడుకోవటం చెయ్యమని అన్నారు. 

-శ్రీజ