రాష్ట్రపతి పాలనతోనే తెలంగాణ

Posted: 10/17/2013 08:53 AM IST

బీజేపీ అగ్రనేత అద్వానీ తెలంగాణ ఏర్పాటు విషయంలో కొన్ని ఆసక్తికర వ్యాఖ్యలు చేశారు. నరేంద్ర మోడీని ప్రధాని అభ్యర్థిగా ప్రకటించిన తరువాత తొలిసారిగా ఆయన తో కలిసి గాంధీనగర్ లో ఓ కార్యక్రమంలో పాల్గొన్న అద్వానీ ఆంధ్రప్రదేశ్ విభజన విషయంలో యూపీఏ వ్యవహరిస్తున్న తీరును బీజేపీ అగ్రనేత ఎల్.కె.అద్వానీ తప్పుబడుతూనే , నరేంద్ర మోడీని ప్రశంసించారు . ఈ సందర్భంగా  తెలంగాణ అంశం గురించి  ప్రస్తావిస్తూ... తెలంగాణ రాష్ట్రం ఏర్పాటు చేయాలంటే ఆంధ్ర ప్రదేశ్ లో ఖచ్చితంగా  రాష్ట్రపతి పాలన విధిస్తే తప్ప సాధ్యం కాదని ఆయన అభిప్రాయ పడ్డారు.

ఒక ప్రాంత ప్రజలు ప్రత్యేక రాష్ట్రాన్ని కోరుకుంటే  మరో ప్రాంత ప్రజలు దానికి సుముఖంగా  లేరు. ఇలాంటి పరిస్థితుల్లో తెలంగాణ ఏర్పాటు చేస్తామన్న వారి ప్రకటనను అమలు చేయడం సాధ్యం కాదని అన్నారు. తెలంగాణ రాష్ట్రాన్ని ఏర్పాటు చేస్తామని ప్రకటించిన తర్వాత ఆంధ్రప్రాంతంలో ఎందరో చనిపోయారు . ఎన్టీఏ హయాంలో మూడు రాష్ట్రాల ఏర్పాటు గురించి మాట్లాడుతూ ఎన్నో జాగ్రత్తలు తీసుకున్నాం. బీహార్ ముఖ్యమంత్రి లాలు ప్రసాద్ యాదవ్ జార్ఖండ్ ఏర్పాటు చేస్తే నా శవం పై నుండే ఏర్పాటు చేయాల్సి ఉంటుందని అన్నారు. కానీ ఎలాంటి ఇబ్బందులు లేకుండా రాష్ట్రాల ఏర్పాటు చేశాం అని గుర్తు చేశారు.

ఇప్పటికే కాంగ్రెస్ పార్టీ తెలంగాణ బిల్లును పార్లమెంటులో పెడితే మద్దతు ఇస్తుందా ? ఇవ్వదా ? అనే అనుమానాలు తెలంగాణ వాదుల్లో వ్యక్తం అవుతున్న తరుణంలో అద్వానీ ఇలాంటి వ్యాఖ్యలు చేయడం రాజకీయ వర్గాల్లో ఆసక్తి రేపుతుంది. 2014 తరువాత మోడీ ప్రధాని అయితే తెలంగాణ విషయంలో బీజేపీ యూటర్న్ తీసుకుంటుందా ? అనే విధంగా అద్వానీ వ్యాఖ్యలు ఉన్నాయంటున్నారు తెలంగాణ వాదులు.