బాబు సైకిల్ కి గాలి కొడుతున్న రాయపాటి?

Posted: 10/10/2013 04:35 PM IST

రాష్ట్ర విభజనకు వ్యతిరేకంగా గుంటూరు ఎంపీ రాయపాటి సాంబశివరావు రాజీనామా చేసిన విషయం తెలిసిందే. ఆయన రాజీనామా చేసిన తరువాత బీజేపిని పొగడ్తలతో ముంచెత్తారు. ఇక రాయపాటి కమలంలో కలిసిపోతాడని అందరు అనుకున్నారు. కానీ రాయపాటి ఇప్పుడు కొత్తగా రూట్ మార్చారు. సమైక్యాంద్ర కోసం ఢిల్లీలో ఏపీ భవన్ లో ఆమరణ దీక్ష చేస్తున్న తెలుగుదేశం పార్టీ అధినేత నారా చంద్రబాబు నాయుడు పై రాయపాటి మనసు కలిగింది. అనుకున్నది వెంటనే రాయపాటి ఢిల్లీకి బయలుదేరటం జరిగింది. దీక్షలో ఉన్న చంద్రబాబు వద్దకు చేరుకున్న రాయపాటి తన మనస్సులో నింపుకున్న ప్రేమను చంద్రబాబు పై కురిపించారు. ఈ విషయం తెలుసుకున్నకాంగ్రెస్ నాయకులు.. రాయపాటి.. చంద్రబాబు సైకిల్ కి గాలికొడుతున్నారని సెటైర్లు వేసుకుంటున్నారు. దీంతో రాయపాటి కాంగ్రెస్ నుండి టీడీపీలోకి జంప్‌ అయ్యేందుకు రంగం సిద్ధం అయ్యింది.

 

 

ఢిల్లీ ఏపీ భవన్‌లో దీక్ష చేస్తున్న చంద్రబాబును ఆయన కలిసి సంఘీభావం తెలిపారు. సమైక్య రాష్ట్రం కోసం లక్షలాది మంది రోడ్ల మీద పోరాడుతున్న పట్టించుకోవడం లేదని రాయపాటి విమర్శించారు. హైదరాబాద్‌ను దేశ రెండో రాజధానిగా కాని ఉమ్మడి రాజధానిగా చేయాలని ఆయన డిమాండ్ చేశారు. రాజీనామా చేయడంతోనే కాంగ్రెస్ పార్టీతో తనకున్న అనుబంధం ముగిసిందని తెలియజేశారు. పార్టీ మార్పుపై సరైన సమయంలో నిర్ణయం తీసుకుంటానని తెలిపారు. అంతేకాకుండా చంద్రబాబు తనకు పాత మిత్రుడు అని రాయపాటి సాంబశివరావు తెలిపారు.