సకల జనభేరీలో నాయకులు అన్నమాటలు

Posted: 09/29/2013 06:24 PM IST

హైద్రాబాద్ నిజాం కాలేజ్ గ్రౌండ్స్ లో జరుగుతున్న సకలజన భేరీలో ఇంతవరకు నాయకుల అన్న మాటలు ఇవిః

తెలంగాణా ఎన్జీవో సంఘ అధ్యక్షుడు దేవీ ప్రసాద్ ఈ సభను ఇంతవరకు ఎటువంటి ఆంక్షలు, నిషేధాలు జరిగుతున్న మొదటి సభగా పేర్కొన్నారు.  ఏపి ఎన్జీవోలు సమ్మె ఎందుకు చేస్తున్నారో వారికే తెలియటం లేదని, వారు దానిమీద శ్వేత పత్రాన్ని విడుదలచెయ్యాలని అన్నారు.

కేవలం హైద్రాబాద్ మీద పెత్తనం కోసమే సమైక్యాంధ్ర ఉద్యమం జరుగుతున్నదని, సామాన్య ప్రజానీకాన్నిరెచ్చగొట్టి హైద్రాబాద్ లో ఆస్తులను సంపాదిస్తున్నారని ఉద్యోగుల ఐకాస చైర్మన్ శ్రీనివాస గౌడ్ అన్నారు.  హైద్రాబాద్ లో ఉన్నవారిని తమతో కలుపుకుంటామని కూడా ఆయన హామీ ఇచ్చారు.

తెలంగాణా ఏర్పాటుకు అడ్డుపడుతున్నది ముఖ్యమంత్రేనని, హైద్రాబాద్ మీదనే దృష్టి పెట్టి సమైక్య నాయకులు మాట్లాడుతున్నారని, కానీ తెలంగాణాకు హైద్రాబాద్ గుండెకాయని తెలంగాణా ఐకాస నాయకుడు గోవర్ధన్ అన్నారు. 
తెలంగాణా న్యాయవాదుల ఐకాస నాయకుడు రాజేందర్ రెడ్డి మాట్లాడుతూ, తెలంగాణాకు వ్యతిరేకంగా ఉద్యమాలను హైద్రాబాద్ లో అనుమతించబోమని, జై తెలంగాణా అనేవాళ్లే హైద్రాబాద్ లో ఉంటారని ఘాటుగా అన్నారు.  సీమాంధ్రులు రాష్ట్ర విభజనకు సహకరించాలని ఆయన కోరారు. 

తెలంగాణా సుదీర్ఘ పోరాట ఫలితమే రాష్ట్ర విభజనకు చేసిన నిర్ణయమని, తెలంగాణా రాష్ట్ర అంతిమ దశకు చేరుకున్నదని అన్న సిపిఐ ఎమ్మెల్యే గుండా మల్లేశ్, తెలంగాణా ప్రజలది కడుపు కాలిన పోరాటంగా అభివర్ణించారు.  ఆంధ్రా లో జరుగుతున్నది మాత్రం అప్రజాస్వామిక పోరాటమని అన్నారాయన. 

భాజపా తరఫున సభకు హాజరైన నాగం జనార్దన రెడ్డి తెలంగాణా బిల్లును పార్లమెంటులో రాబోయే శీతాకాల సమావేశాలలో ప్రవేశపెట్టాలని కోరుతూ, భాజపా దానికి పూర్తి సమర్ధన తెలియజేస్తుందని అన్నారు.  ఒకవేళ కాంగ్రెస్ ఇవ్వకపోతే భాజపా అధికారంలోకి వచ్చిన వెంటనే విభజన ప్రక్రియ పూర్తిచేస్తామని నాగం అన్నారు. 

తెలంగాణా ఏర్పాటును ఎవరూ ఆపలేరని, 10 జిల్లాలతో కూడిన తెలంగాణా రాష్ట్రం, రాజధానిగా హైద్రాబాద్ ఏర్పాటు తప్పక అవుతుందని కె కేశవరావు అన్నారు.

-శ్రీజ