జగన్ కి బెయిల్ రాకపోవటానికి కారణం ఇదే- షర్మిల

Posted: 09/16/2013 05:49 PM IST

కాంగ్రెస్ పార్టీ తెలుగు దేశం పార్టీ కుమ్మక్కై వైయస్ జగన్ కి బెయిల్ రానీయటం లేదంటూ వైయస్ ఆర్ పార్టీ నాయకురాలు షర్మిల ఆరోపించారు.  కాంగ్రెస్ పార్టీ రాజకీయ ప్రయోజనం కోసం రాష్ట్రాన్ని ముక్కలు చేసిందని, అందుకు చంద్రబాబు నాయుడు అంగీకార లేఖ తోడ్పడిందని ఆమె అన్నారు. 

విశాఖ పట్నం జగదాంబా సెంటర్లో ప్రసంగించిన షర్మిల ఆ రెండు పార్టీలనూ దుయ్యబట్టారు.  రాహుల్ గాంధీకి పట్టం కట్టటం కోసమే తెలంగాణా వైపు కాంగ్రెస్ పార్టీ మొగ్గు చూపించిందని, బాధ్యతాయుతంగా ప్రవర్తించకుండా ప్రధాన ప్రతిపక్షమైన తెదేపా అధ్యక్షుడు చంద్రబాబు జగన్ బయటకు వస్తే రాష్ట్రానికి నాయకుడౌతాడనే భయంతో జైల్లోనే ఉంచుతున్న కాంగ్రెస్ పార్టీకి మద్దతునిస్తున్నారని షర్మిల ఆరోపణ చేసారు. 

ఇప్పటికైనా ఆలస్యం చెయ్యకుండా రాష్ట్ర విభజనకు మద్దతుగా చంద్రబాబు ఇచ్చిన లేఖను ఆయన ఉపసంహరించుకోవాలని షర్మిల డిమాండ్ చేసారు. 

దాడి వీరభద్రరావు, కొణతాల రామకృష్ణ, వంశీ కృష్ణ తదితర నాయకుల సమక్షంలో ప్రసంగించిన షర్మిల కేంద్ర మంత్రి చిరంజీవి, ముఖ్యమంత్రి కిరణ్ కుమార్ రెడ్డి మీద కూడా విమర్శనాస్త్రాలను సంధించారు.

అన్ని పార్టీలూ తప్పుగా ప్రవర్తిస్తున్నాయి, మా పార్టీ మాత్రమే నికార్సయిందంటూ చెప్పుకొచ్చే అన్ని పార్టీ నాయకుల్లాగానే మిగిలిన పార్టీలు, ఆయా పార్టీలలోని నాయకులను విమర్శించటం ద్వారా వాళ్ళతో పోలిస్తే మా పార్టీ గొప్పది, మా పార్టీ నాయకులే చాలా గొప్పవాళ్ళన్న విషయాన్ని చెప్పకనే చెప్పారు షర్మిల. 

జగన్ కి బెయిల్ రాకపోవటానికి కారణాలు ఊహించి చెప్పిన షర్మిల, అసలు జగన్ జైల్లోకి వెళ్ళటానికి గల కారణాలను, ఆరోపణలకు సమాధానాలను మాత్రం చెప్పలేదు. 

 

-శ్రీజ