తిరుమల సమీపంలో ఇస్లామిక్ యూనివర్శిటీ

Posted: 09/16/2013 11:29 AM IST

కడప జిల్లాలో తొండవాడ దగ్గర హీరా ఉర్దూ అకాడమిక్ డెవలప్ మెంట్ సొసైటీ వారు యూనివర్శిటీ కోసం ఆరు అంతస్తుల భవన నిర్మాణాన్ని చేపట్టారు.  ఇది తిరుపతి పోయే మార్గంలో ఉండటంతో విశ్వ హిందూ పరిషత్, బజరంగ్ దళ్ నాయకులు అభ్యంతరాలు తెలియజేసారు. 

పరిషత్ జిల్లా అధ్యక్షుడు బైరెడ్డి రామకృష్ణారెడ్డి మీడియా సమావేశంలో మాట్లాడుతూ, పవిత్రమైన తిరుమల వేంకటేశ్వర స్వామి ఆలయానికి చుట్టుపక్కల ఇతర మతాల ప్రచారాలు ఉండగూడదని, హిందుత్వాన్ని పరిరక్షించాల్సిన అవసరం ఉందని, ఇటువంటి చర్యలు హిందువుల మనోభావాల మీద దెబ్బతీస్తాయని, ప్రభుత్వం కలుగజేసుకుని అటువంటి వాటిని అడ్డుకోకపోతే ఆందోళన చేపట్టవలసి వస్తుందని అన్నారు. 

ఈ మీడియా సమావేశంలో విహెచ్ పి అధ్యక్షుడు కెవి లక్ష్మీనారాయణ రెడ్డి, ఉపాధ్యక్షుడు వివి సుబ్బయ్య, బజరంగ్ దళ్ అధ్యక్షుడు జె.గణేష్, కోశాధికారి వి.శ్రీనివాసులు, ప్రచార ప్రముఖ్ హెచ్ వి సుబ్బారావు పాల్గొన్నారు. 

పవిత్ర హిందూ దేవాలయాల సమీపంలో ఇటువంటివి సహించరానివని, హిందువులకు మనస్తాపం కలిగించే ఇతర మతస్తుల ప్రచారాలను అడ్డుకోవాలని వారు సూచించారు.

-శ్రీజ