రామ్ చరణ్ జంజీర్ తుఫాన్ లకు భద్రత

Posted: 09/05/2013 11:21 AM IST

రామ్ చరణ్ తేజ నటించిన జంజీర్, తుఫాన్ హిందీ తెలుగు చిత్రాలను రేపు రాష్ట్రంలో విడుదల చేస్తున్న సందర్భంగా వాటికి భద్రత కల్పించవలసిందిగా కోరుతూ ఆ సినిమాల నిర్మాణ సంస్థ రిలయన్స్ బిగ్ ఎంటర్ టైన్ మెంట్ ప్రై లిమిటెడ్ వారు హైకోర్టుని ఆశ్రయించారు. 

కేంద్ర మంత్రి చిరంజీవి బాహాటంగా సమైక్యాంధ్రకు మద్దతుగా నిలిచినందువలన తెలంగాణా ప్రాంతంలోనూ, రాజీనామా చెయ్యటంలేదని, విభజనను ఆపలేదని సీమాంధ్రలో వ్యతిరేక భావాలుండటం వలన ఆయన కుటుంబ సభ్యుల చిత్రాలను విడుదల చెయ్యటానికి 40 రోజులుగా నిర్మాతలు జంకుతున్నారు. 

అయితే జంజీర్ హిందీలోనూ, తుఫాన్ తెలుగులోను నిర్మించిన రిలయన్స్ బిగ్ ఎంటర్ టైన్ మెంట్ వారు 6 న ప్రపంచవ్యాప్తంగా విడుదల చేస్తున్నారు కాబట్టి మన రాష్ట్రంలోనూ చెయ్యక తప్పదు.  అందువలన ఆ సినిమాలు ప్రదర్శిచే చోట భద్రతా ఏర్పాట్లను చెయ్యాలంటూ నిర్మాతలు హైకోర్ట్ ని ఆశ్రయించటం జరిగింది.

విడుదలకు క్యూ కట్టటానికి తయారుగా ఉన్న పెద్ద చిత్రాలు పవన్ కళ్యాణ్ అత్తారింటికి దారేది, రామ్ చరణ్ ఎవడు, జూనియర్ ఎన్టీఆర్ రామయ్యా వస్తావయ్యా, వెంకటేష్ రామ్ ల మసాలా.  జంజీర్ వలన విడుదలకు దారేమైనా ఏర్పడుతుందేమోనని పెద్ద సినిమాలతో పాటు వాటి మీద ఆధారపడ్డ చిన్న సినిమా నిర్మాతలు కూడా ఆసక్తిగా ఎదురు చూస్తున్నారు. 

జంజీర్, తుఫాన్ చిత్రాలు ప్రదర్శిస్తున్న థియేటర్లకు భద్రత కల్పించవలసిందిగా హైకోర్ట్ నుండి ఈరోజు డిజిపి కి ఆదేశాలు అందాయి. 

-శ్రీజ