నాపై కోపం ఉంటే - మాడి మసైపోతారు?

Posted: 09/02/2013 11:08 AM IST

తెలుగుదేశం పార్టీ అధినేత చంద్రబాబు నాయుడు సమైక్యాంద్రకుమద్దతు బస్సుయాత్ర మొదలుపెట్టారు. గుంటూరు జిల్లాలో గురజాల నియోజక వర్గం దాచేపల్లి మండలంలోని పొందుగుల గ్రామం నుంచి బాబు యాత్ర ప్రారంభించారు.నాపై కోపం ఉంటే నా మీదే చూపండి తెలుగు జాతితో పెట్టుకుంటే మాడి మసైపోతారని చంద్రబాబు సోనియాగాంధీని హెచ్చరించారు. రాష్ట్ర విభజన అంశంపై గత 30 రోజులుగా సీమాంధ్ర ప్రాంతంలో ఆందోళనలు నిర్వహిస్తున్న నేపథ్యంలో రాష్ట్రంలోని ప్రతిపక్షనేతగా విభజనపై తన గళం వినిపించేందుకు చంద్రబాబు ఆత్మగౌరవ బస్సు యాత్రకు శ్రీకారం చుట్టారు. చంద్రబాబు మాట్లాడుతూ చిన్నపాటి సమస్యలను సైతం ఇరు వర్గాలు కలసి చర్చించి పరిష్కారం వెతుకుతారన్నారు. ఇందుకు భిన్నంగా రాష్ట్రంలోని ఇరు ప్రాంతాల్లో గత కొన్నేళ్ళుగా కొనసాగుతున్న సమస్యను సీడబ్ల్యూసీ గంటపాటు సమావేశంలోనే తేల్చడం సరికాదన్నారు. సీమాంధ్ర, తెలంగాణ ప్రాంతాల్లోని ఉద్యోగ, విద్యార్థి, వ్యాపార, మేధావులతో ఒకటి పదిమార్లు చర్చించిన అనంతరం ఇరు ప్రాంతాలకు న్యాయం జరిగేలా చూడాల్సింది పోయి సోనియాగాంధీ చిచ్చురేపిందని విమర్శించారు. అలాగే ఇటీవల రాష్ట్రంలో జరిగిన పంచాయతీ ఎన్నికల్లో టీడీపీకి ప్రజలు బ్రహ్మరథం పట్టడం ఓ వైపు మరో వైపున కేంద్ర ఇంటెలిజన్స్‌ వర్గాలు 2014 ఎన్నికల్లో కాంగ్రెస్‌ పార్టీకు రాష్ట్రంలో కనీసం 6 స్థానాలు వచ్చే పరిస్థితి లేదనండటంతో రాష్ట్ర విభజన అంశానికి సోనియాగాంధీ శ్రీకారం చుట్టిందన్నారు.

 

కుమారుడు రాహుల్‌ గాంధీని ప్రధానిని చేసేందుకు ప్యాకేజీల వీరుడు టీఆర్‌ఎస్‌ నేత కెసీఆర్‌, బెయిల్‌, కేసుల మాఫీ కోసం యత్నిస్తున్న జగన్‌ పార్టీలతో లోపాయికారి ఒప్పందం కుదుర్చుకొని రామలక్ష్మణుల్లా కలసివున్న రాష్ట్ర ప్రజలను వాలిసుగ్రీవుల్లా విడగొట్టిందని దుయ్యబట్టారు. 1982కు ముందు కేంద్ర స్థాయిలో గుర్తింపులేని రాష్ట్రాన్ని, ప్రజలను అన్న ఎన్టీఆర్‌ టిడిపి స్థాపించి తెలుగువారి ఆత్మగౌరవాన్ని ఢిల్లీ పెద్దలకు వినిపించారన్నారు. అదే స్ఫూర్తితో పాలనను అందిస్తూ హైదరాబాద్‌ నగరాన్ని ప్రపంచంలోని ప్రముఖ నగరాలకు ధీటుగా తీర్చిదిద్ధి ఖ్యాతిని ఖండాం తరాలుగా వ్యాపింపచేశానన్నారు. రాష్ట్రానికి ప్రత్యేక గుర్తింపును తీసుకొని వచ్చి ఐటీ రంగ అభివృద్ధితోపాటు అనేక రంగాల్లో రాష్ట్రాన్ని విజయపథంలో నడిపించానన్నారు. అందుకు భిన్నంగా తొమ్మిదిన్నర ఏళ్ళ కాంగ్రెస్‌ పాలనలో స్వార్థ రాజకీయాలు, తమ పదవులను కాపాడుకునేందుకే సమయాన్ని కాంగ్రెస్‌ నాయకులు వెచ్చించారన్నారు. అన్ని రంగాల్లో రాష్ట్రాన్ని అధోగతి పాలుచేశారని ఆవేదన వ్యక్తం చేశారు. వైఎస్సార్‌ కుటుంబం ఢిల్లీలో ఒకమాట గల్లీలో ఒక మాట మాట్లాడుతూ రాష్ట్ర ప్రజలను మోసగిస్తోందన్నారు.