ప్రధానిపై ధ్వజమెత్తిన చంద్రబాబు

Posted: 08/29/2013 10:08 AM IST

సీమాంధ్రలో జనమంతా రోడ్ల మీదకు వచ్చి నాలుగు వారాలుగా జనజీవనం స్థంబించిపోతుంటే కూడా మౌనం వీడరా తమరు? అంటూ తెలుగు దేశం పార్టీ అధ్యక్షుడు చంద్రబాబు నాయుడు ప్రధానమంత్రి మన్మోహన్ సింగ్ కి లేఖాస్త్రాన్ని సంధించారు.  అన్ని విషయాల్లో మౌనాన్ని పాటించటం సరికాదని చెప్తూ, ఈ సందర్భంలో అది బాధ్యతలను విస్మరించి పలాయన మంత్రం పఠించటమేనంటూ చంద్రబాబు విమర్శించారు. 

రెండు సార్లు గెలిపించి మీకు గద్దెను కట్టబెట్టింది ఇందుకేనా?  తెలుగువారి ఆత్మగౌరవం మీద దెబ్బ కొడతారా! పైగా అర్థం పర్థం లేని వ్యాఖ్యలతో దిగ్విజయ్ సింగ్ ఒక పక్కనుంచి వైషమ్యాలను ఎగదోస్తున్నారు!  ఉద్యోగుల మధ్య విభేదాలు వచ్చాయి.  2009 లో ప్రకటన తర్వాత తెలంగాణా ప్రాంతంలోను, ఇప్పడు సిడబ్లుసి ప్రకటనతో సీమాంధ్రలోను రాష్ట్రంలో కల్లోలాన్ని సృష్టిస్తున్నారు.  ఇదేనా రాష్ట్ర ప్రజలకు మీరు చేసే నిర్వాకం అంటూ చంద్రబాబు దుయ్యబట్టారు.

మా బాధలు చెప్పుకోవటానికి మేము ఢిల్లీ రావలసి వస్తోంది.  కానీ మీరు మాత్రం పట్టించుకోరు.  ఎపిఎన్జీవో నేతలు మిమ్మల్ని కలుస్తే మీరు వాళ్ళని ఆంటోనీ కమిటీకి పొమ్మంటారా!  అంటే ఇది పార్టీ అంతర్గత వ్యవహారమా?  ప్రజల సమస్య ప్రభుత్వ సమస్య కాదా?

ఇప్పటికైనా పార్టీ పక్షపాతాన్ని అధిగమించి కాంగ్రెస్ పార్టీ కుట్రలో భాగం కాకుండా ప్రభుత్వంలో ఉన్నతమైన స్థానాన్ని అధిరోహించిన మీరు ప్రధాన మంత్రిగా తీసుకోవలసిన చర్యలు తీసుకోండి అని చంద్రబాబు ప్రధాన మంత్రిని కోరారు. 

-శ్రీజ