సీమాంధ్రుల భయాలను పోగొట్టటం అవసరం!

Posted: 08/17/2013 01:57 PM IST

రెండు రాష్ట్రాలలోనూ అభివృద్ధిని చూడాలంటే సీమాంధ్రుల మనసులోని భయాందోళనలను పోగొట్టటం అవసరమని, అందుకు చర్చలే ప్రముఖ పాత్ర వహిస్తాయని మాజీ పిసిసి అధ్యక్షుడు ధర్మపురి శ్రీనివాస్ అన్నారు.  రెండు రాష్ట్రాల వలన ప్రయోజనమే కలుగుతుందని అర్థం చేసుకోవాలంటే ఇరు ప్రాంతాలకు చెందిన టిఎన్జీవో, ఏపి ఎన్జీవో సంఘాల నాయకులు కలిసి కూర్చుని మాట్లాడుకోవటం ఎంతైనా అవసరమని శుక్రవారం మీడియా సమావేశంలో డిఎస్ అన్నారు. 

తెలుగు మాట్లాడేవారు వ్యాపారంలో రాణిస్తారన్న సత్యం జగమంతా ఎరిగినదేనని, అందువలన రాష్ట్ర విభజన తెలుగువారి మధ్యలో చిచ్చు రగిలించాల్సిన అవసరం లేదని అభిప్రాయపడ్డ డిఎస్, ఇతర రాష్ట్రాల నుంచి వచ్చి జంటనగరాలలో నివాసముంటున్నవారు భయాందోళనలకు గురికావలసిన అవసరం ఎంతమాత్రం లేదని, ఇక్కడ నివాసమున్నవారిని బయటకు పంపించేసే అధికారం ఎవరికీ లేదని, అందువలన హైద్రాబాద్ విషయంలో అనవసరంగా ఆదుర్దా పడవద్దని అన్నారు. 

సీమాంధ్రులకు ప్రోత్సాహంగా, వెయ్యి కిలోమీటర్ల కోస్తా ప్రాంతమంతా అరడజను ఓడరేవులతో ఇంకా అభివృద్ధి చెందటానికి ఎంతో అవకాశమున్నదని చెప్తూ తెలంగాణా ప్రాంతంలో లాగా కాకుండా సీమాంధ్రలో రాజధానిగా మలుచుకోవటానికి ఎన్నో నగరాలున్నాయన్న సంగతి తెలియజేసారు డిఎస్.

చాలాకాలంగా మౌనంగా ఉన్న ధర్మపురి శ్రీనివాస్ ఒక్కసారిగా రాజకీయ చైతన్యంతో మీడియాను పిలిచి మరీ మాట్లాడటంతో రాజకీయ వర్గాల్లో, ఢిల్లీలో ఆయనేదో పెద్ద వరాన్నే అందిపుచ్చుకునివుంటారనే భావన కలుగుతోంది.  అది కేవలం కొత్త రాష్ట్రంలో తిరిగి పిసిసి పదవా లేకపోతే ఇంకా పెద్ద పదవా అన్నది చర్చించుకుంటున్నారు.

-శ్రీజ