శ్రీహరికోటలో జిఎస్ఎల్ వి-డి5 లాంచ్ తయారీలు

Posted: 08/17/2013 12:04 PM IST

శ్రీహరి కోట నుంచి ప్రయోగింపబడుతున్న జిఎస్ ఎల్ వి – డి 5 కి రేపు ఉదయం 11.50 నుంచి కౌంట్ డౌన్ ప్రారంభమౌతోంది.  ఇది 29 గంటలు జరిగి, 19 న సాయంత్రం 4.50 కి టేకాఫ్ అవుతుందని ఇస్రో అధికార ప్రతినిధి తెలియజేసారు.

దేశీయంగా రూపొందించిన క్రయోజెనిక్ అప్పర్ స్టేజ్ తో శక్తివంతమైన జిఎస్ ఎల్ వి – డి 5 కమ్యూనికేషన్ కోసం నిర్మించిన జిసాట్-14 ని తీసుకెళ్ళి అంతరిక్షంలో ప్రవేశపెడుతుంది.

భూమికి సమాంతరంగా నడిచే ఉపగ్రహాలను అంతరిక్షంలో ప్రవేశపెట్టే జియోసిన్క్రోనస్ శాటిలైట్ లాంచ్ వెహికిల్ (జిఎస్ ఎల్ వి) ది ఈసారి ఇది ఐదవ లాంచ్.  శ్రీహరికోట లోని సతీష్ ధవన్ స్పేస్ సెంటర్ మొదటి లాంచ్ 2001 లో జిసాట్-1 ని రోదసీ లోకి తీసుకెళ్ళటంతో ఈ ప్రక్రియ ప్రారంభమైంది.

కమ్యూనికేషన్ కోసం తయారు చేసిన జిసాట్-14 లో ఆరు ఎక్స్టెండెడ్ సి బ్యాండ్, ఆరు క్యూ బాండ్ ట్రాన్స్ పాండర్లున్నాయి. 

160 అడుగుల ఎత్తున్న జిఎస్ ఎల్ వి మూడు స్టేజీల అంతరిక్ష వాహనం.  దీని బరువు 414 టన్నులు. 

2010 లో ఏప్రిల్ 15 న ఇస్రో (ఇండియన్ స్పేస్ రిసెర్చ్ ఆర్గనైజేషన్) లాంచ్ చేసిన జిఎస్ ఎల్ వి-3 ప్రయోగం విఫలమైంది.  దాని వైఫల్యంమీద అధ్యయనం చేసిన నిపుణుల బృందం, మూడవ స్టేజిలో బ్లాస్ట్ అవటానికి అవసరమైన లిక్విడ్ హైడ్రోజెన్ ఇంజన్ లోకి చేరకపోవటంతో విజయాన్ని సాధించలేకపోయిందని తేల్చింది.  ఈసారి అటువంటిది ఏర్పడకుండా క్వాలిటీ కంట్రోల్ చేసారు. 

లాంచ్ వెహికిల్ ని లాంచ్ ప్యాడ్ దగ్గరకు చేర్చటం జరిగింది.  రేపు కౌంట్ డౌన్ సమయం లోపులో మిగిలిన ఏర్పట్లను చేసి లాంచ్ కి సిద్ధం చెయ్యటానికి కృషి జరుగుతోంది.  దీన్ని ఇస్రో చాలా ప్రతిష్టాత్మకంగానూ చాలా ముఖ్యమైనదిగానూ భావిస్తోంది.

-శ్రీజ