తెలుగు భాష సంగతేమిటి?

Posted: 08/16/2013 05:05 PM IST

Buddha prasad worried about telugu language

కాంగ్రెస్ పార్టీ రాష్ట్ర విభజన మీద తీసుకున్న నిర్ణయం, దాని మీద చేసిన ప్రకటన మీద అన్ని స్థాయిల్లోనూ మల్లగుల్లాలు జరుగుతుండగా రాష్ట్ర అధికార భాషా మండలి ఛైర్మన్ మండలి బుద్ధ ప్రసాద్ కూడా తన వంతు వాదనను వినిపించారు.

ఆంధ్రప్రదేశ్ లో ఉన్న ఆరుకోట్ల తెలుగువారు, ఇతర రాష్ట్రాలు, దేశాలలో ఉన్న మరో రెండు కోట్ల మంది కోసం ఆంధ్రప్రదేశ్ ప్రభుత్వం సమావేశాలు, వివిధ కార్యక్రమాలను నిర్వహిస్తూ వస్తోంది. విభజన జరిగితే ఆ పనిని ఎవరు చూస్తారు. భాషను బ్రతికించుకోకపోతే అంతరించిపోయిన సంఘటనలు చరిత్రలో మనకు విరివిగా దొరుకుతాయి. హిందీ భాషను పరిరక్షించటానికి భారత ప్రభుత్వం కృషి చేస్తున్నట్లుగానే తెలుగు భాష కోసం ఆంధ్ర ప్రదేశ్ పాటుపడుతోంది. విభజన వలన అది కాస్తా కుంటుపడుతుందని మండలి ఆవేదనను వ్యక్తపరచారు.

జవహార్ లాల్ నెహ్రూ, వల్లభ్ భాయ్ పటేల్, పట్టాభి సీతారామయ్యలతో కలిసిన (జెవిపి) కమిటీయే భాషా ప్రాతిపదికమీద రాష్ట్ర విభజన చెయ్యాలని నిర్ణయించుకుని 1956 లో ఆ దిశగా రాష్ట్రాలను రూపొందించే పనిని ఆంధ్ర ప్రదేశ్ తో మొదలుపెట్టింది. నిజానికి ఆ ప్రతిపాదన 1924 లోనే కాంగ్రెస్ పార్టీ నాయకుడొకతను చేస్తే దాన్ని 1934 లో కాంగ్రెస్ పార్టీ అంగీకరించిందని, కాకపోతే 1948లో ధార్ కమిషన్ సిఫారస్ చెయ్యకపోవటం వలన అప్పుడు జరగని పని జెవిపి కమిటీ వలన జరిగిందని బుద్ధ ప్రసాద్ గుర్తు చేసారు.

భాషాధారిత రాష్టాల కోసం అంత పాత కాలంలో తీసుకున్న ఆ నిర్ణయానికి వ్యతిరేకంగా ఇప్పడు కాంగ్రెస్ పార్టీ తెలుగువారి రాష్ట్రాన్ని ముక్కలు చెయ్యటానికి తెగబడ్డదని బుద్ధ ప్రసాద్ వాపోయారు.

-శ్రీజ