రాములమ్మ దారిలో గులాబీకి గుడ్ బై చెబుతున్న టీఆర్ఎస్ నేతలు

Posted: 08/06/2013 10:16 AM IST

నిన్నటి వరకు వంద సీట్లు 20 ఎంపీ సీట్లు గెలుచుకుంటాం అని బీరాలు పలికిన గులాబీ బాస్ ఆశలు అవిరిగా మారుతున్నాయి. గులాబీ బాస్ తో చెట్టపట్టాలు వేసుకొని తిరిగిన గులాబీ నేతలు గోడ దూకే పనిలో బిజీగా ఉన్నారు. అర్థరాత్రి పూట గులాబీలు పట్టుకొని కాంగ్రెస్, టిడిపిల నేతల కొంపల చుట్టు తిరుగుతున్నారు. సీనియర్ నాయకుడు కనిపిస్తే చాలు.. చేతికి గులాబీ ఇచ్చి, మెడలో మల్లెపుల దండ వేసి, తమను రాజకీయంగా బతికించాలని కోరుకుంటున్నారు. ఇలా రోజు రోజుకు గోడ దూకే గులాబీ నేతల లిస్టు పెరిగిపోతుంది. తెలంగాణ ప్రత్యేక రాష్ర్ట్ర ప్రకటన నేపథ్యంలో ముందస్తు బెర్తుల కోసం నేతలు అధికార పార్టీకి జై కొట్టేందుకు సిద్ధమవుతున్నారు. టీఆర్‌ఎస్ పార్టీకి చెందిన ఇద్దరు మాజీ మంత్రులు వలస బాటలో ఉన్నారు. మాజీ మంత్రులు గుండె విజయరామారావు, చందూలాల్ ఢిల్లీలో కాంగ్రెస్ రాష్ట్ర వ్యవహారాల ఇన్‌చార్జి దిగ్విజయ్‌సింగ్‌తో సమావేశమయ్యారు. టీఆర్‌ఎస్‌ను వీడి కాంగ్రెస్‌లో చేరే అంశంపై మంతనాలు జరిపినట్లు ప్రచారం జరుగుతోంది. ప్రత్యేక రాష్ట్ర ప్రకటన, కాంగ్రెస్‌లో టీఆర్‌ఎస్ విలీన ప్రచారంతో గులాబీలు తమ రాజకీయ భవితవ్యం కోసం ముందుగానే ప్రణాళికలు రూపొందించుకుంటున్నారు.

 

ముందస్తుగా కాంగ్రెస్‌లో చేరితే కొంత మేరకైనా ప్రాముఖ్యత ఉంటుందన్న ఆశతో బేరసారాలు సాగిస్తున్నారు. టీఆర్‌ఎస్ ఆవిర్భావం నుంచి పార్టీలో ఉన్న మాజీ మంత్రి విజయరామారావు కొంత కాలంగా పార్టీ కార్యక్రమాలకు దూరంగా ఉంటున్నారు. అంతేకాకుండా మరో ఎనిమిది మంది గులాబీ నేతలు కాంగ్రెసు పార్టీలో చేరేందుకు సిద్ధంగా ఉన్నారని, వారం రోజుల్లో తెరాసని కాంగ్రెసులో విలీనం చేయకపోతే, తానే వారిని కాంగ్రెసు పార్టీలో చేర్పిస్తానని తెలంగాణ యునైటెడ్ ఫ్రంట్ ప్రధాన కార్యదర్శి కపిలవాయి దిలీప్ కుమార్ అల్టిమేటం జారీ చేశారు. టీఆర్ఎస్ ను కాంగ్రెసులో విలీనం చేయాలంటే చేయాలని, సమయం వృథా చేయవద్దని సూచించారు. కేంద్రమంత్రి అజిత్ సింగ్, ఎపి కాంగ్రెసు పార్టీ రాష్ట్ర వ్యవహారాల పర్యవేక్షకులు దిగ్విజయ్ సింగ్‌ల ద్వారా తమను కాంగ్రెసులో చేర్చాలని ఎనిమిది మంది గులాబీ నేతలు తనను సంప్రదించారన్నారు. టీఆర్ఎస్ ఏ నిర్ణయం తీసుకుంటుందో వారం రోజులు చూస్తానని, లేకుంటే తానే వారిని కాంగ్రెసులో చేర్చుతానని దిలీప్ కుమార్ చెప్పారు. తెలుగుదేశం పార్టీలోకి ముగ్గురు చేరేందుకు సిద్ధంగా ఉన్నారని తెలుస్తోంది. రాములమ్మ దారిలోనే గులాభీ నేతలు కూడా వెళ్లటంతో ..గులాబీ బాస్ భవనంలో గులాబీ కాంతులు తగ్గినట్లు తెలుస్తోంది. ఇలా గోడ దూకే నేతలపై గులాబీ బాస్ ఏం చేస్తారో చూడాలి.