ముగిసిన పంచాయతీ ప్రహసనం

Posted: 08/01/2013 11:15 AM IST

తుది విడత పంచాయతీ ఎన్నికలలో ఓట్ల లెక్కింపు కూడా పూర్తై ఫలితాలు ఈ రోజు ఉదయమే వెలువడ్డాయి.  ఈ రోజు ఉదయం వరకూ కొనసాగిన ఓట్ల లెక్కింపు తర్వాత ఫలితాల తుది లెక్కలు ఇలా ఉన్నాయి-

రాష్ట్రం మొత్తంలో 21233 పంచాయతీల్లో ఎన్నికలు జరిగాయి.  వాటిలో రాజకీయ పార్టీలకు మద్దతునిచ్చే పంచాయతీ సర్పంచ్ ల సంఖ్యలను పరిగణనలోకి తీసుకుంటే పార్టీల బలాబలాలు ఈ విధంగా ఉన్నాయి-

తెలుగుదేశం పార్టీ 6132 పంచాయతీలలో గెలుపు సాధించింది.  తరువాతి స్థానంలో కాంగ్రెస్ పార్టీ 6001 పంచాయతీ స్థానాలను కైవసం చేసుకుంది.  మూడవస్థానంలో వైకాపా 3890, తర్వాత స్థానంలో తెరాస 1684 స్థానాలను గెలుచుకున్నాయి.  వామపక్షాలు 324 పంచాయతీలలో గెలుపొందారు.  3202 పంచాయతీల్లో ఇండిపెండెంట్లు విజయం సాధించారు. 

పై లెక్కల ప్రకారం తెలుగుదేశం పార్టీ ముందంజలో ఉన్నా, మొన్న చేసిన తెలంగాణా ప్రకటనతో కాంగ్రెస్ పార్టీ తెరాస స్థానాలను కూడా తన ఖాతాలో జమచేసుకోగలుగుతుంది.  అలాగే వైకాపా కూడా విలీనమయినట్లయితే వాటిని కూడా సీమాంధ్రలో జమ చేసుకోగలుగుతుంది.  అప్పుడు రాష్ట్రంలో మరోసారి తిరుగులేని విజయాన్ని సాధించిన ఘనత కాంగ్రెస్ పార్టీకే దక్కుతుంది.  అందుకే కాంగ్రెస్ ప్రస్తుతం సీమాంధ్రమీద దృష్టి సారిస్తోందని వార్తలు వస్తున్నాయి. 

సమైక్య ఆంధ్రప్రదేశ్ రాష్ట్రంలోని పంచాయతీ ఎన్నికలు ఇవే చిట్టచివరవి అవుతాయి. 

-శ్రీజ