మోదీ సభకు ప్రవేశ రుసుం

Posted: 07/16/2013 10:24 AM IST

రాజకీయ చరిత్రలో మొట్టమొదటిసారిగా బహిరంగ సభలకు ప్రవేశరుసుము వసూలు చేస్తోంది భారతీయ జనతా పార్టీ.  గుజరాత్ ముఖ్యమంత్రి, రాబోయే ఎన్నికలలో భాజపా ప్రధానమంత్రి అభ్యర్థి నరేంద్ర మోదీ (మోడి) ఆంధ్రప్రదేశ్ ప్రజలనుద్దేశించి ఆగస్ట్ 11 న హైద్రాబాద్ లో నిర్వహించబోతున్న బహిరంగ సభ నవ భారత యువ భేరి లో ప్రసంగించబోతున్నారు.  దానిలో ప్రవేశం కావాలంటే రూ.5.00 చెల్లించాల్సిందే. 

ఇది వింతగా అనిపిస్తోంది కదూ.  కానీ నిజంగా ఈ ప్రక్రియ రాజకీయాల్లో కొత్త పుంతే.  బహిరంగ సభలను విజయవంతం చెయ్యటానికి జన సమీకరణ చేసే రాజకీయనాయకులకు ఇది వ్యతిరేకమైన ఏర్పాటు.  బహిరంగ సభకు వాళ్ళంతట వాళ్లు రావటమే కాకుండా ప్రవేశ రుసుము చెల్లించి మరీ పాల్గొనటమనేది వాళ్ళకి పార్టీ మీద, ప్రసంగీకుల మీద ఉన్న అభిమానాన్ని చూపుతుంది. 

ఆ విధంగా పోగైన ధనాన్ని ఉత్తరాఖండ్ వరద బాధితులకు అందజేస్తామన్నారు నరేంద్ర మోదీ.  భాజపా ప్రకటించినదాని ప్రకారం ఇప్పటికే 35000 మంది ఆ సభలో పాల్గొనటానికి తమ అంగీకారాన్ని ఆన్ లైన్ లో తెలియజేసారట.  ఇదే సంభవిస్తే, భారత రాజకీయ ప్రస్తానంలో ఇది నిజంగా ఒక మైలురాయేనని చెప్పాలి.  బహిరంగ సభలో పాల్గొనే ఔత్సాహికుల్లో, ఐటి రంగం, వృత్తులలో ఉన్నవారు, లాయర్లు ఉన్నారని భాజపా తెలియజేసింది.

-శ్రీజ