అమ్మచే అంక్షింతలు వేయించుకున్నాడు

Posted: 06/06/2013 11:55 AM IST

తాను స్థాపించిన పార్టీని కాంగ్రెస్ లో కలిపినందుకుగాను, కేంద్రమంత్రి పదవితో పాటు, తన వర్గానికి చెందిన వారికి కేబినెట్ లో రెండు పదవులు పొందిన మెగాస్టార్ చిరంజీవి అంటే కాంగ్రెస్ పార్టీ వారికి గానీ, సోనియాగాంధీకి గానీ ప్రత్యేకమైన అభిమానం. అలాంటి చిరంజీవికే సోనియాగాంధీ అంక్షింతలు వేసిందని తాజా సమాచారం. రాష్ట్ర మంత్రి వర్గంలో తిగుబాటు మంత్రులను తొలగించేందుకు సిద్ధం చేసిన జాబితాలో చిరు వర్గానికి చెందిన మంత్రి సి. రామచంద్రయ్య ఉన్న విషయం తెలిసిందే. దీంతో అతన్ని ఎలాగైనా కాపాడుకోవాలనే ప్రయత్నంలో బాగంగానే సోనియాను కలిసిన చిరుకు కాస్తంత నిరాశే ఎదురైంది.

రాష్ట్రంలో విద్యుత్‌ సమస్య వల్ల ప్రజలు చాలా ఇబ్బందుల పడ్డారని, ఇది వైఫల్యంవల్లే జరిగిందని చెప్పిన చిరంజీవి , ప్రజా సమస్య కాబట్టే ఈ విషయంలో ప్రభుత్వాన్ని సిఆర్‌ నిలదీశారని చెప్పుకొచ్చారు. కానీ కాంగ్రెస్‌ అధినేత్రి సోనియాగాంధీ అంతా విన్నాక చిరంజీవికి చురకలు అంటించినట్లు తెలిసింది. మంత్రి వర్గంలో ఉండి ఎవరైనా ప్రభుత్వా నికి వ్యతిరేకంగా మాట్లాడతారా, సిఆర్‌ను అదుపుచేయండి అంటూ చిరంజీవికి సోనియా చురకలు అంటించారట. దీంతో చిరంజీవి చిన్నబోయి బయటకి వచ్చాడని అక్కడి మీడియా వారు చెబుతున్నారు. రాష్ట్రంలోని మంత్రుల పై, ఇక్కడ జరుగుతున్న పరిణామాల పై ఓ కన్నేసి ఉంచిన అధిష్టానం ఎప్పటికప్పుడు సమాచారాన్ని సేకరిస్తుందని, ఇక్కడి వారు ఎంత నచ్చజెప్పే ప్రయత్నం చేసినా అక్కడ వినేపరిస్థితుల్లో లేరని అంటున్నారు. మొత్తానికి తనవాడి కొసం పోయి చిరు చివాట్లు తినాల్సివచ్చిందని అంటున్నారు.