సబితా ఇంద్రారెడ్డి విషయం నాకు తెలియదు..

Posted: 05/15/2013 06:41 PM IST

జగన్ అక్రమాస్తుల కేసులో భాగమైన దాల్మియా సిమెంట్స్ వ్యవహారంలో తన తప్పిదం ఏమీలేనందున ప్రభుత్వపరంగా తనకు న్యాయ సహకారం అందించాలని ముఖ్యమంత్రి ఎన్ కిరణ్‌కుమార్‌డ్డికి హోం మంత్రి సబితా ఇంద్రాడ్డి విజ్ఞప్తి చేశారు. ఈ కేసులో జూన్ 7న సీబీఐ ప్రత్యేక కోర్టుకు స్వయంగా హాజరుకావాలంటూ సబితకు సమన్లు అందిన విషయం తెలిసిందే. ఈ నేపథ్యంలో ముఖ్యమంత్రిని ఆయన క్యాంప్ కార్యాలయంలో సబిత కలిశారు. సీబీఐ ఎదుట హాజరైన ధర్మాన ప్రసాదరావును కేబినెట్‌లో కొనసాగించినట్లే తననూ కొనసాగించాలని ఆమె సీఎంకు విజ్ఞప్తి చేసినట్లు తెలిసింది. సబిత విషయం లో కేంద్ర హోంశాఖ మంత్రి సుశీల్ కుమార్ చాలా దూరంగా ఉన్నట్లు తెలుస్తోంది. ముఖ్యమంత్రి కిరణ్ కుమార్ రెడ్డి సబితా ఇంద్రా రెడ్డి ని కాపాడే పనిలో బిజీగా ఢిల్లీకి వెళ్లి కాంగ్రెస్ పెద్దలతో మంతనాలు జరుపుతున్నారు. రాష్ట్ర హోం మంత్రి సబితా ఇంద్రారెడ్డి వ్యవహారంలో కేంద్రం జోక్యం చేసుకోబోదని కేంద్ర హోం మంత్రి సుశీల్ కుమార్ షిండే స్పష్టం చేశారు.

ప్రతినిధుల సమావేశంలో సబితా ఇంద్రారెడ్డి వ్యవహారంపై ఆయన స్పందించారు. సబితా ఇంద్రారెడ్డి వ్యవహారం పూర్తిగా రాష్ట్ర పరిధిలోనిదని, కేంద్రం జోక్యం చేసుకోదని ఆయన అన్నారు. మీరు కేంద్రంలో హోం మంత్రిగా ఉన్నారు, రాష్ట్ర హోం మంత్రి సబితా ఇంద్రారెడ్డి పేరును వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో నిందితురాలిగా సిబిఐ చేర్చింది, మీరేమంటారని మీడియా ప్రతినిధులు అడిగినప్పుడు ఆయన ఆ విధంగా అన్నారు. దీన్ని బట్టి సబితా ఇంద్రారెడ్డి వ్యవహారాన్ని కాంగ్రెసు అధిష్టానం పూర్తిగా ముఖ్యమంత్రి కిరణ్ కుమార్ రెడ్డికి వదిలేసినట్లు అర్థమవుతోంది. కాగా, "తెలంగాణపై ఆందోళనలు సాగుతున్నాయి, తెలంగాణ ఎంపిలు పార్లమెంటులో ఆందోళన చేశార"ని మీడియా ప్రతినిధులు ప్రస్తావిస్తే ఆ విషయాన్ని తాము పరిగణనలోకి తీసుకుంటున్నామని, తెలంగాణ అంశం కేంద్ర ప్రభుత్వ పరిశీలనలో ఉందని సుశీల్ కుమార్ షిండే చెప్పారు.