వైసీపీ పై లగడపాటి విమర్శలు

Posted: 05/08/2013 01:21 PM IST

Political mp lagadapati rajagopal comment on ys jagan party

విజయవాడ పార్లమెంటు సభ్యుడు లగడపాటి రాజగోపాల్ ఈ రోజు కర్ణాటక రాజకీయలపై ద్రుష్టి పెట్టారు. కర్ణాటకలో ఉన్న బిఎస్సార్ పార్టీ, మన రాష్ట్రంలో ఉన్న వైఎస్సార్ పార్టీ ఒక్కేటేనని ఆయన అన్నారు. కర్ణాటకలో బిఎస్సార్ పార్టీకి డిపాజిట్ కూడా దక్కలేదు. ధనబలం ఉన్న పార్టీగా తెరపైకి వచ్చిన గాలి జనార్థన్ రెడ్డి పార్టీ చివరకు ఓటమి చవిచూసిందని లగడపాటి మండిపడ్డారు. అంతేకాకుండా బిఎస్సార్ పార్టీకి, వైఎస్సార్ పార్టీకి చాలా దగ్గర పోలికలు ఉన్నాయాని ఆయన అన్నారు. ఆ పార్టీ అధినేత జైల్లో ఉన్నారు. అలాగే వైఎస్సార్ పార్టీ అధినేత జైల్లో ఉన్నారు. బిఎస్సార్ పార్టీ ఎన్నికల గుర్తు ఫ్యాన్ , వైఎస్సార్ పార్టీ ఎన్నికల గుర్తు ఫ్యాన్. ఇలా ఒకే పోలికలు కలిగి ఉన్నాయాని లగడపాటి గుర్తించారు. అయితే కర్ణాటకలో బిఎస్సార్ పార్టీకి జరిగిందే .. మన రాష్ట్రంలో వైఎస్సార్ పార్టీకి జరుగుతుందని ఆయన చెబుతున్నారు.

2014లో వైఎస్సార్ పార్టీ ఓడిపోవటం ఖాయమని లగడపాటి అంటున్నారు. ధనబలంతో శాసించగలమని బిఎస్సార్ కాంగ్రెసు పార్టీ అధికార భారతీయ జనతా పార్టీ నుండి విడిపోయిందని, అలాంటి అవినీతి పార్టీని ప్రజలు కర్నాటకలో మట్టికరిపిస్తున్నారన్నారు. అహంకారంతో పెట్టిన పార్టీ అలాగే కూలిపోతుందన్నారు. గతంలో ఉప ఎన్నికల్లో బిఎస్సార్ కాంగ్రెసు పార్టీ అభ్యర్థి శ్రీరాములు సెంటిమెంటు కారణంగా గెలుపు సాధించి అదే తరహా రాష్ట్రంలో ఉంటుందని భావించారని ఎద్దేవా చేశారు. మన రాష్ట్రంలో కూడా అదే పరిస్థితి తప్పదన్నారు. వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి ఓటమి తప్పదన్నారు.

దివంగత వైయస్ రాజశేఖర రెడ్డి చేసిన పథకాలను జగన్ తమవిగా ప్రచారం చేసుకోవడం వల్ల కాంగ్రెసు పార్టీ కొద్దికాలం ఇబ్బందులను ఎదుర్కొందన్నారు. ఇప్పుడిప్పుడే ప్రజలు తెలుసుకుంటున్నారన్నారు. కాంగ్రెస్ పార్టీ రాష్ట్రంలో ఎప్పుడు బలహీనపడలేదని, ఓట్లు మాత్రమే జగన్, కాంగ్రెసుగా చీలాయన్నారు. వచ్చే ఎన్నికల్లో కాంగ్రెస్ పార్టీ వైపే అందరూ వస్తారన్నారు. ఇప్పుడిప్పుడే ప్రజలు మేలుకుంటున్నారని సహకార ఎన్నికల ఫలితాలను చూస్తే తెలుస్తుందన్నారు. అంతేకాకుండా వైసీపీ నాయకులు చాలా మంది కాంగ్రెస్ పార్టీలో చేరటానికి సిద్దంగా ఉన్నారని లగడపాటి అన్నారు.