అమ్మా నీకే అంకితం

Posted: 05/06/2013 10:50 AM IST

అమ్మా నీకే అంకితం ’.. అంటూ ప్రముఖ దర్శకుడు దాసరి నారాయణ రావు వినిపించిన మాటలు.. ‘‘నాన్నా.. ఆరోగ్యం ఎలా ఉంది అని అడుగుతుంది కూతురు. నాన్నా .. వ్యాపారం ఎలా ఉంది అని అడుగుతాడు కొడుకు. తల్లిదండ్రుల పట్ల అభిమానం, వాత్సల్యం కూతురికే ఉంటుందని ఆయన అంటున్నారు. మహిళలు ఎదుర్కొంటున్న సమస్యలను వివరిస్తూ, స్త్రీ పట్ల సానుకూల స్పందన ఆవశ్యకతను తెలుపుతూ తెరకెక్కిన వీడియో సాంగ్ ఆల్బమ్ 'అమ్మా నీకే అంకితం'. మురళీమోహన్ చారిటబుల్ ట్రస్ట్ ఈ ఆల్బమ్‌ను సమర్పించింది. శంభు ప్రసాద్ స్వరపరచగా పి.యస్.నారాయణ దర్శకత్వం వహించారు. ఈ ఆల్బమ్‌ను హైదరాబాద్‌లో ఆవిష్కరించారు. దాసరి నారాయణరావు విశిష్ట అతిథిగా పాల్గొని ప్రసంగిస్తూ "ఒకప్పుడు మగువను చూస్తే తమ తల్లో, చెల్లో, కూతుర్నో గుర్తు చేసుకునేవారు. ఇప్పుడా పరిస్థితులు లేవు. నాకాంపౌండ్ నుంచి వచ్చిన మురళీమోహన్, మోహన్‌బాబు పేదలకు సాయం చేస్తున్నారు. కళాకారులు సంపాదించినదానిలో కొంత భాగాన్ని ఖర్చు చేస్తున్నారు.

తల్లిదండ్రుల్ని కొడుకుల కన్నా, కూతుర్లే ఆప్యాయంగా చూసుకుంటారు. నేను స్త్రీ పక్షపాతిని. అందుకే స్త్రీలకు సంబంధించి పలు సినిమాలు చేశాను. ఈ ఆల్బమ్ వల్ల ఒక్కరిలో మార్పు వచ్చినా అది సమాజాన్ని కదిలించినట్టే లెక్క. పేదలకు మా ట్రస్ట్ 'నీడ' ద్వారా చేయూతనివ్వడానికి ఎప్పుడూ ముందుంటాం'' అని అన్నారు. "నిర్భయ ఉదంతం కలచివేసింది. ఆ తర్వాత జరిగిన దుర్ఘటనలు ఇంకా వేదించడంతో ఈ ఆల్బమ్‌ను రూపొందించాను. న్యాయం, చట్టం చేయలేని పనులను ప్రజల్లో చైతన్యం కలిగించి సాధించవచ్చన్నది నా నమ్మకం'' అని పి.యస్.నారాయణ తెలిపారు. మురళీమోహన్ మాట్లాడుతూ "తల్లి కడుపులో పడ్డప్పటి నుంచి మట్టిలోకి చేరేవరకు స్త్రీకి పలు అంశాల్లో చేదు అనుభవంలోకి వస్తూనే ఉంది. ఈ పరిస్థితిపై మార్పు రావాలని నారాయణ కాన్సెప్ట్ చెప్పగానే చేయాలనిపించింది'' అని అన్నారు.