విద్యుత్ సమస్య నుంచి వేడి బయ్యారం గనుల వైపుకి

Posted: 04/20/2013 03:04 PM IST

ఖమ్మం జిల్లా బయ్యారం లోని ఇనుప ఖనిజ గనులను విశాఖపట్నం స్టీల్ ప్లాంట్ సంస్థైన రాష్ట్రీయ ఇస్పాట్ నిగమ్ లిమిటెడ్ కి అప్పజెప్పాలన్న ప్రభుత్వం ఆలోచనను తప్పు పడుతూ ప్రతిపక్షాలు మరోసారి ధ్వజమెత్తాయి.

తెలాంగాణా రాష్ట్ర సమితి నాయకుడు హరీష్ రావు ప్రాణత్యాగానికైనా సిద్ధమే కానీ తెలంగాణా ఖనిజ సంపదను విశాఖ పట్నం పోనివ్వమని అన్నారు.  అసలు తెలంగాణా లో స్టీల్ ప్లాంట్ ఎందుకు పెట్టరంటూ సిపిఐ, తెరాస నాయకులు ప్రభుత్వాన్ని ప్రశ్నిస్తున్నారు. 

తెలుగు దేశం పార్టీ కూడా బయ్యారం గనులను విశాఖ స్టీల్ కి  అప్పగించటం సరికాదన్నారు.  ఈ విషయంలో ముఖ్యమంత్రిని కలిసిన తెదేపా నాయకులు బయ్యారం గనులను తెలంగాణా కే అప్పజెప్పాలని కోరారు.  వైయస్ ఆ గనులను తన అల్లుడికి పట్టంగడితే అభ్యంతరాలు తెలిపి గనుల లీజ్ ను రద్దు చెయ్యాలని మొట్టమొదటిగా కోరింది చంద్రబాబు నాయుడే నని మోత్కుపల్లి గుర్తుచేసారు.  ఈ విషయంలో ముఖ్యమంత్రి మొగ్గు చూపుతూ బయ్యారంలోనే కర్మాగారాన్ని స్థాపించే ఏర్పాటు చేస్తామని అన్నారని ఎర్రబల్లి దయాకర్ అన్నారు. 

వీరికి విరుద్ధంగా, బయ్యారం గనులను విశాఖ స్టీల్ ప్లాంట్ ఇస్తే తప్పేముందని టి.జి.వెంకటేష్ ప్రశ్నించారు. కేటాయిస్తున్నది తెలుగు మాట్లాడే ప్రజల ప్రాంతానికే గా.  ఇందులో ఇంత రాద్ధాంతం చెయ్యాల్సిందేముంది, అన్నారాయన.  అసలు అభ్యంతరమంతా తెలంగాణా ప్రజల మీద ప్రేమతో కాదు, ఆంధ్రా మీద కక్షతో.  ఆంధ్రప్రదేశ్ కి రావలసి నీరు రాకుండా మహారాష్ట్రలో అక్రమంగా కట్టడాలను కడితే ఏం మాట్లాడరు కానీ బయ్యారం మీద రాద్ధాంతం చేస్తున్నారంటూ టిజి వెంకటేష్ విమర్శించారు. 

 -శ్రీజ