ఈ సంవత్సరం దాదాసాహెబ్ ఫాల్కే పురస్కారం ప్రాణ్ కి

Posted: 04/13/2013 12:54 PM IST

హిందీ సినిమారంగంలో అసంఖ్యాకమైన చిత్రాల్లో తనదైన శైలితో విభిన్న పాత్రలను పోషించిన 93 సంవత్సరాల ప్రాణ్ ని 2013 సంవత్సరానికి భారత ప్రభుత్వం ఇచ్చే దాదాసాహెబ్ ఫాల్కే పురస్కారానికి ఎంపిక చేసారు. 

తన సినీరంగ జీవితంలో ఎన్నో ఫిల్మ్ ఫేర్ మరి ఇతర పురస్కారాలను గ్రహించిన ప్రాణ్ కృష్ణ సికంద్ ఎంతో కాలం దుష్ట పాత్రలలో నటించి, మనోజ్ కుమార్ నిర్మించిన ఉపకార్ సినిమా నుంచి కారెక్టర్ యాక్టర్ గా స్థిరపడ్డారు.  అనుకరించలేని నటన, వైవిధ్యం, వాచకంతో హిందీ ప్రేక్షకులను అలరించిన ప్రాణ్ ప్రస్తుతం రిమేక్ లో ఉన్న జంజీర్ లో సంజయ్ దత్ వేస్తున్న పఠాన్ పాత్రను పోషించారు.  డాన్ లాంటి సినిమాల్లో హీరోతో సరితూగే పాత్రలలో జీవించిన ప్రాణ్ ని 2001 లో భారత ప్రభుత్వం పద్మ భూషణ బిరుదుతో సత్కరంచింది. 

సినిమాల్లో రాణించటమే కాకుండా నిజజీవితంలో ప్రాణ్ ఎన్నో స్వచ్ఛంద సంస్థలలో పాలుపంచుకున్నారు.  బాంబే డైనామోస్ ఫుట్ బాల్ టీమ్ పేరుతో తనదైన ఒక ఫుట్ బాల్ బృందాన్ని ప్రాణ్ స్థాపించారు.  సినిమా పరదా మీద దయాదాక్షిణ్యాలు లేని కర్కోటకమైన దుష్ట పాత్రలలో నటించిన ప్రాణ్ కి నిజజీవితంలో అందరితో సరదాగా కలిసిపోయే గుణంతో అందరినీ ఆకట్టుకునే అలవాటుంది.

ప్రాణ్ కి దాదాసాహెబ్ ఫాల్కే పురస్కారం లభించటం పట్ల సినీ ప్రముఖులంతా సంతోషాన్ని వ్యక్తం చేసారు.  దేర్ హై పర్ దురుస్త్ హై (ఆలస్యంగా చేసినా మంచిపని చేసారు) అని అన్నారు. 

-శ్రీజ