రెగ్యులేటరీ అధారిటీ

Posted: 04/03/2013 03:25 PM IST

రెగ్యులేటరీ అధారిటీ నిర్ణయాన్ని పూర్తిగా ప్రకటించకుండా వినియోగదారులమీద కొత్త విద్యుత్ ఛార్జీలను ఎలా వేస్తారంటూ నిన్న హైకోర్టు ప్రశ్నించింది. విద్యుత్ ఛార్జీలు విపరీతంగా పెంచారని, ప్రభుత్వం విద్యుదుత్వాదనలోనూ విద్యుత్సేవలోనూ విఫలమైందని, దీనివలన రాష్ట్రంలోని రెండున్నర కోట్ల విద్యుత్ వినియోగదారులు అష్టకష్టాలు పడుతున్నారని హైకోర్టులో వేసిన వ్యాజ్యంలో పిటిషనర్ తరఫున వాదించిన సీనియర్ అడ్వకేట్ ఎస్.రామచంద్రరావు అన్నారు. ఉదాహరణగా ఆయన 3500 రూపాయల వేతనంతో బ్రతుకు వెళ్ళదీస్తున్న తన క్లెయింట్ ఈ పెరిగిన ఛార్జీల వలన 1100 రూపాయలను విద్యత్ కోసం వెచ్చించాల్సి వస్తుందని ఆయన అన్నారు. ఈ విషయంలో వివిధ వర్గాల నుంచి వచ్చిన అభ్యంతరాలను ఏపిఇఆర్ సి పెడచెవిని పెట్టిందని కూడా అన్నారు. దాని మీద, ఛీఫ్ జస్టిస్ ఎన్.వి.రామన్, జస్టిస్ విలాస్ అఫ్జల్ పుర్కర్ ల డివిజన్ బెంచ్ ఏపిఇఆర్ సి కి ప్రాతినిధ్యం వహిస్తున్న అడ్వకేట్ ని ఈ విషయంలో వివరణ కోరగా, కొత్తగా పెరిగిన విద్యుత్ ఛార్జీల వరకు తీసుకోవలసిన చర్యకు సంబంధించిన భాగాన్నివిడుదల చేసారు కానీ, ఇంకా పూర్తి వివరణాత్మక ఆదేశాలను విడుదల చెయ్యలేదని, అది మరో రెండు వారాల తర్వాత విడుదలవుతుందని అన్నారు. అలాంటప్పుడు బయటకే రాని ఆర్డర్ లోని అంశాలు ఏప్రిల్ నుంచి ఎలా వర్తిస్తాయంటూ హైకోర్టు ప్రశ్నించింది. మీరనే ఆ సంపూర్ణమైన ఏపిఐఆర్ సి ఆదేశాలను సమర్పించండి అంటూ ధర్మాసనం విచారణను సోమవారానికి వాయిదా వేసింది.