రాష్ట్రపతి చేతుల మీదుగా పద్మ పురస్కారాల

Posted: 04/05/2013 02:16 PM IST

padma-awards

ఈరోజు న్యూఢిల్లీలో రాష్ట్రపతి భవన్ లో రాష్ట్రపతి చేతుల మీదుగా పద్మ పురస్కారాల ప్రదాన వేడుక జరిగింది.

అందులో మూవీ మొఘల్ గా పేరుగాంచిన డా.దగ్గుబాటి రామానాయుడు, హిందీ నటి షర్మిలా టాగూర్, క్రికెట్ ఆటగాడు రాహుల్ ద్రవిడ్ లతో పాటు ఇంకా కొందరికి పద్మ భూషణ పురస్కారం లభించింది.

దక్షిణ, ఉత్తర భారత దేశాలలో సినీ రంగంలో నం.1 గా పేరుగాంచిన శ్రీదేవి, తెలుగుతనాన్ని రేఖాచిత్రాలలో అత్యంత సుందరంగా పొదిగి తనదైన శైలిని పరిచయం చేసి బాపుగా తెలుగువారికి సుపరిచితులైన సత్తిరాజు లక్ష్మీనారాయణ పద్మశ్రీ పురస్కారాన్ని గ్రహించారు.

ఈ సంవత్సరం దేశంలోని వివిధ ప్రాంతాలకు చెందిన వివిధ రంగాలలో నిష్ణాతులైన ప్రముఖులకు మొత్తం 108 మందికి పద్మ పురస్కారాలు ఇచ్చారు. అందులో నలుగురు పద్మ విభూషణ, 24 మంది పద్మ భూషణ, 80 మంది పద్మశ్రీ పురస్కారాలను గ్రహించారు.

ఆంధ్రప్రదేశ్ నుంచి పురస్కారాలు అందుకున్న మిగతావారిలో, చేనేత కళాకారుడు గాజమ్ అంజయ్య, సురభి నాటక కళాకారుడు సురభి బాబ్జి, సైన్స్ మరి ఇంజినీరింగ్ రంగానికి చెందిన డా.ఎమ్.రామకృష్ణరాజు, డా.జయరామన్ గౌరి శంకర్, వైద్యరంగానికి చెందిన డా.వెంకట సుందర రామ్, సాహిత్యరంగంలో డా.రాధిక కు పద్మశ్రీ పురస్కారాలు లభించాయి. డా.రామానాయుడికి పద్మభూషణ లభించగా, పద్మవిభూషణ పురస్కారం మన రాష్ట్రానికి చెందినవారినెవరినీ వరించలేదు.

-శ్రీజ