Posted: 04/04/2013 12:23 PM IST

కేంద్ర సమాచార శాఖా మంత్రి కపిల్ సిబాల్ న్యూఢిల్లీలో జరిగిన మీడియా సమావేశంలో ప్రభుత్వ కార్యకలాపాల్లో తలదూర్చిన భారత అత్యున్నత న్యాయస్థానాన్ని తప్పుపట్టారు. ఆర్థిక విషయాల్లో అనుభవం లేని కోర్ట్ లు ప్రభుత్వ విధానాల్లో కలుగజేసుకోగూడదని తన అభిప్రాయాన్ని వెలిబుచ్చారు.

టెలికాం శాఖను బంగారు గుడ్లు పెట్టే బాతుగా అభివర్ణించిన కపిల్ సిబాల్, 2జి స్పెక్ట్రమ్ నియామకాలను రద్దు చేసినందువలన ఎవరికీ ఏ ప్రయోజనం కలుగకుండా అయిందన్నారు. 2010 నుంచి 2013 వరకు చూసుకుంటే 176 వేల కోట్ల రూపాయలకు బదులు ప్రభుత్వానికి కేవలం వెయ్యి కోట్ల రూపాయల ఆదాయం మాత్రమే వచ్చిందని, వినియోగదారుల మీదనేమో ఛార్జీలు పెరిగిపోయాయని, ప్రైవేటు టెలిఫోన్ ఆపరేటర్ల విషయానికొస్తే వాళ్ళేమో అప్పుల్లో కూరుకుపోయారని అన్నారు. అందుకే ఏదైనా నిర్ణయం తీసుకునేముందు అందుకు తగ్గ అనుభవం ఉండాలన్నారాయన- అది న్యాయస్థానానికి లేదన్న సంకేతాన్నిస్తూ.

ఎవరికీ ఏ ప్రయోజనం కలుగలేదన్న వాదన సరికాదేమో. ఎందుకంటే, అంతకు ముందు అక్రమ కేటాయింపుల్లో చాలా కంపెనీలు బాగుపడ్డాయి. ఎవరో ఒకరికి లాభం కలిగితే చాలు అనుకుంటే అసలు ఈ వివాదమే ఉండేది కాదు. అక్రమంగా 2జి కేటాయింపులు జరగటాన్ని సరిదిద్దుకోలేకపోయినందువలనే వాటిని రద్దు చేసింది సుప్రీం కోర్టు. అదే సరిగ్గా జరిగుంటే కలుగజేసుకునేది కాదు కదా. బంగారు గుడ్లు పెట్టే బాతుని చంపలేదు. ఆ గుడ్లను అపహరిస్తున్న వారిని అరికట్టింది సుప్రీం కోర్టు.

2జి స్పెక్ట్రమ్ ఇప్పటికీ ఒక కొలిక్కి రాని కేసు. ఎవరి తప్పో ఇంకా తేలకుండా వున్న విషయం. తప్పు జరిగిందని అందరూ అంగీకరిస్తున్నా దాన్ని సవరించలేక ఒకరి మీద ఒకరు దోషాన్ని ఆపాదించుకుంటున్న సమయంలో సుప్రీం కోర్టు ఆ ఒప్పందాలను రద్దు చేసి చరిత్రాత్మమైన నిర్ణయం తీసుకుంది.

 

-శ్రీజ