Posted: 04/01/2013 07:22 PM IST

ముఖ్యమంత్రి కిరణ్ కుమార్ రెడ్డికి, పీసీసీ ఛీప్ బొత్స సత్యనారాయణకి ఒకరంటే ఒకరికి పడదనే విషయం తెలిసిందే. కానీ ఎప్పుడు ఎవరు ఎలా మారుతారో చెప్పలేం. విద్యుత్ ఛార్జీల విషయంలో ముఖ్యమంత్రి కిరణ్ కుమార్ రెడ్డికి రవాణా శాఖ మంత్రి బొత్స సత్యనారాయణ అండగా నిలిచాడు. కిరణ్ అన్నీ ఏకపక్ష నిర్ణయాలు తీసుకుంటాడని తన మంత్రి వర్గ మంత్రులు అయిన డీఎల్ రవీంద్రా రెడ్డి, సి. రామచంద్రయ్యలు బాహాటంగానే విమర్శిస్తుంటే... బొత్స మాత్రం కిరణ్ ని వెనకేసుకొచ్చాడు. డీఎల్ రవీంద్రారెడ్డి వ్యాఖ్యల పై స్పందించిన బొత్స, కిరణ్ ఏకపక్ష నిర్ణయాలు తీసుకోవడం లేదని, ఏ నిర్ణయం తీసుకున్నా కాంగ్రెస్ పార్టీకి మేలు చేసే నిర్ణయాలే తీసుకుంటాడని అన్నారు. విద్యుత్ చార్జీల పెంపుతో కాంగ్రెస్ పార్టీకి ఇబ్బందులు తప్పవని, తాము పేదలపై భారం పడకుండా చూస్తామన్నారు. విధ్యుత్ ఛార్జీల పెంపు అంశంలో పేదలపై భారం పడకుండా చూస్తామని చెప్పినా ప్రతిపక్షాలు ఆందోళన చేయడం అర్థరహితమన్నారు. ధనవంతులకు విద్యుత్ ఛార్జీలు పెరగకుండా ఉండేందుకే వైయస్సార్ కాంగ్రెసు పార్టీతో సహా ఇతర ప్రతిపక్షాలు ఆందోళన చేస్తున్నాయని మండిపడ్డారు .

ఈఆర్సీ ప్రతిపాదనలపై చర్చించి నిర్ణయం తీసుకుంటామన్నారు . విద్యుత్ ఛార్జీలు ఇంకా పెరగలేదని బొత్స అన్నారు.  మరో వైపు ముఖ్యమంత్రి విద్యుత్ చార్జీల పెంపుపై ఎవరూ ఆందోళన చెందనవసరం లేదని ముఖ్యమంత్రి కిరణ్‌కుమార్‌రెడ్డి హామీ ఇచ్చారు. ఇందిరమ్మ బాట కార్యక్రమంలో ఉన్న ఆయన మాట్లాడుతూ... కాంగ్రెస్ ప్రభుత్వంలో పేదవారికి ఇబ్బంది కలగదని, ప్రభుత్వ సంక్షేమ కార్యక్రమాల్లో కరెంట్ ఒక ముఖ్యమైనదని ఆయన అన్నారు. ఈఆర్సీ ప్రతిపాదించిన విద్యుత్ చార్జీలపై సమీక్ష జరుపుతామని ముఖ్యమంత్రి పేర్కొన్నారు. పేదలకు సహాయం చేసే విషయంలో మేము టీడీపీ అధ్యక్షుడు చంద్రబాబునాయుడు, బీజేపీ దగ్గర పాఠాలు నేర్చుకోవాల్సిన అవసరం లేదని సీఎం అన్నారు.