Posted: 12/31/2012 02:38 PM IST

తెలంగాణకు అనుకూలమని అఖిలపక్ష సమావేశంలో టిడిపి చెప్పడంతోనే తన రాజకీయ భవిష్యత్తుకు గండి పడుతుందనే భయంతో టిఆర్‌ఎస్ పార్టీ అధినేత చంద్రశేఖర్‌రావు కల్లుతాగిన కోతిలా లతుకోరు భాష ఉపయోగించి టిడిపిపై, పార్టీ అధినేత చంద్రబాబుపై అసత్య ఆరోపణలు చేస్తున్నాడని తెలంగాణ టిడిపి ఫోరం కన్వీనర్ ఎర్రబెల్లి దయాకర్‌రావు, పార్టీ పొలిట్‌బ్యూరో సభ్యుడు కడియం శ్రీహరి, పబ్లిక్ అకౌంట్స్ కమిటీ చైర్మన్ రేవూరి ప్రకాశ్‌రెడ్డి తీవ్రస్థాయిలో ధ్వజమెత్తారు. తెలంగాణ రాజకీయ జెఎసి చైర్మన్ కోదండరాం టిఆర్‌ఎస్‌కు తొత్తుగా వ్యవహరించకూడదని హితవు పలికారు. జెఎసి విషయంలో కోదండరాం స్వతంత్రంగా వ్యవహరిస్తే తెలంగాణ విషయంలో తాము కలసి పనిచేయడానికి సిద్ధమని అన్నారు. నగరంలోని టిడిపి జిల్లా పార్టీ కార్యాలయంలో ఏర్పాటు చేసిన విలేఖరుల సమావేశంలో టిడిపి నేతలు మాట్లాడుతూ కేంద్రహోం శాఖ మంత్రి సుశీల్‌కుమార్ షిండే అధ్యక్షతన జరిగిన అఖిలపక్ష సమావేశంలో తెలంగాణకు అనుకూలమని టిడిపి చెప్పడంతో జీర్ణించుకోలేక కెసిఆర్ తమ పార్టీపై చేస్తున్న విమర్శలు మానుకోకపోతే గుణపాఠం చెబుతామని హెచ్చరించారు. టిడిపి వైఖరిని వక్రీకరించి ప్రజలను తప్పుదోవ పట్టించడానికి చేస్తున్న ప్రయత్నాలను ఇప్పటికైనా ఆపకుంటే తమ తడాఖా ఏమిటో చూపిస్తామని హెచ్చరించారు. ఉద్యమాన్ని అడ్డం పెట్టుకుని పదవులు, డబ్బులు కూడబెట్టుకుంటున్న కెసిఆర్ కుటుంబం త్వరలో రాజకీయ సమాధి కావడం ఖాయమని తెలిపారు. రాజకీయ పబ్బం గడుపుకోవడానికి, పార్టీ మనుగడకోసం విమర్శలకు పాల్పడుతున్నారని ఆరోపించారు.

అన్ని పార్టీల నాయకులు టిడిపి వైఖరిని స్వాగతిస్తుండగా కేవలం టిఆర్‌ఎస్, జెఎసి నాయకులు మాత్రమే భయపడుతున్నారని అన్నారు. తెలంగాణ ప్రజలు ఇప్పటికైనా టిడిపి వైఖరిని అర్ధం చేసుకోవాలని, కెసిఆర్ నిజస్వరూపాన్ని గమనించాలని కోరారు. తెలంగాణ ప్రజలను మరోసారి మోసం చేయడానికే సోనియాగాంధీని మాట్లాడనివ్వడం లేదని, ఆమె మాట్లాడితే కెసిఆర్ ఆవినీతి బట్టబయలు అవుతుందని విమర్శించారు. పొలిటికల్ జాక్ ఛైర్మన్ కోదండరాం కెసిఆర్ తొత్తుగా వ్యవహరించకుండా స్వతంత్రంగా ఉద్యమించాలని హెచ్చరించారు. ఊసరవెల్లి కూడా సిగ్గుపడే విధంగా రంగులు మారుస్తున్న కెసిఆర్ తన భాష మార్చుకోకపోతే భంగపాటు తప్పదని అన్నారు. టిడిపి ఫ్లెక్సీలను తగులబెట్టినా, నాయకులను అడ్డుకున్నా సహించబోమని, కార్యకర్తలు తరిమితరిమి కొడతారని తీవ్రస్థాయిలో హెచ్చరించారు.