Posted: 12/31/2012 01:49 PM IST

భారతదేశ సంపదను యుపిఎ చైర్‌పర్సన్ సోనియగాంధీ తన సొంత దేశమైన ఇటలీకి నెలవారీ పద్ధతుల్లో తరలిస్తున్నారని మాజీ మంత్రి, తెలుగుదేశం శాసనసభాపక్షం ఉపనేత గాలి ముద్దుకృష్ణమనాయుడు ఆరోపించారు. సోనియా నిర్వాకంతో దేశం, రాష్ట్రంలో భవిష్యత్తు దుర్భిక్షంగా మారుతుందని ఆందోళన వ్యక్తం చేశారు. కడప జిల్లా ప్రొద్దుటూరు పట్టణంలో జరిగిన కామరాజు దండపాణి సంస్థల చైర్మన్ శ్రీనివాస్‌కుమార్ టిడిపి రాష్ట్ర వాణిజ్య విభాగం కార్యదర్శిగా ప్రమాణ స్వీకార కార్యక్రమానికి ఆయన ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ ఇటలీ వనితకు కాంగ్రెస్ పార్టీ నేతలు అమ్ముడుపోయారన్నారు. రాష్ట్రంలో సుపరిపాలన అందించిన ఘనత చంద్రబాబుదేనన్నారు. ఎఐసిసి ప్రధాన కార్యదర్శి రాహుల్‌గాంధీ సైతం ఈ విషయాన్ని ఒప్పుకున్నారన్నారు. పేదలకు అవసరమైన వసతులను కల్పించడంలో కాంగ్రెస్ ప్రభుత్వం విఫలమయిందన్నారు. మానభంగాలు, హత్యలు పెరిగిపోయాయన్నారు. చంద్రబాబు హయాంలో హైదరాబాద్‌లోని గచ్చీబౌలి, మాదాపూర్, కొండాపూర్‌లను భూలోక స్వర్గాలుగా మారాయన్నారు. ప్రస్తుత ముఖ్యమంత్రి కిరణ్ కుమార్‌రెడ్డి ఇన్‌పుట్ సబ్సీడి ఇవ్వలేని స్థితిలో ఉన్నారన్నారు.