Posted: 12/25/2012 12:35 PM IST

దేశ రాజదానిలో  మహిళల రక్షణ కోసం  ఉద్యమం జరగుతున్న సమయంలో  ఒక మంత్రి  మహిళ ఎమ్మెల్యే పై నోరు పారేసుకున్నారు. మహిళలపై నేరాలు, ఢిల్లీలో పారామెడికల్‌ విద్యార్థినిపై అత్యాచారం ఘటనలపై దేశవ్యాప్తంగా ఒకవైపు తీవ్ర నిరసనాగ్రహాలు వ్యక్తమవుతుండగా, కేరళ హోం మంత్రి రాధాకృష్ణన్‌ మాత్రం సిపిఎంకు చెందిన మహిళా ఎమ్మెల్యే కెకె లతికపై నోరు పారేసుకున్నారు. కాంగ్రెస్‌కు అనుబంధంగా ఉన్న గెజిటెడ్‌ ఆఫీసర్ల సంఘం సమావేశంలో హోం మంత్రి రాధాకృష్ణన్‌ మాట్లాడుతూ లతికపై పరుష వ్యాఖ్యలు చేశారు. టిపి చంద్రశేఖరన్‌ హత్య కేసులో లతిక భర్త మోహనన్‌ జైల్లో ఉంటే, ఈమె మాత్రం అసెంబ్లీలో తన సీటు నుంచి దుముకుతున్నారని, నృత్యాలు చేస్తున్నారని అనుచిత వ్యాఖ్యలు చేశారు. లతిక భర్త మోహనన్‌ సిపిఎం కోజికోడ్‌ జిల్లా కార్యదర్శివర్గ సభ్యులుగా ఉన్నారు. ఒక మహిళా ఎమ్మెల్యేపై హోం మంత్రి ఇలాంటి వ్యాఖ్యలు చేయడంపై రాష్ట్రవ్యాప్తంగా తీవ్ర నిరసనలు వ్యక్తమయ్యాయి. కాంగ్రెస్‌ అనుకూల మలయాళ మనోరమ వార్తా పత్రిక మంత్రి రాధాకృష్ణన్‌ ప్రసంగాన్ని వివరంగా ప్రచురించింది.

అయినా మంత్రి మాత్రం దీనిపై ఎలాంటి విచారం వ్యక్తం చేయడంగానీ, వివరణగానీ ఇవ్వలేదు. కాగా, తనపై మంత్రి చేసిన అనుచిత వ్యాఖ్యలపై అసెంబ్లీ స్పీకర్‌ జి.కార్తికేయన్‌కు లిఖితపూర్వక ఫిర్యాదు చేసినట్లు లతిక వెల్లడించారు. మహిళా ఎమ్మెల్యేపై అనుచిత వ్యాఖ్యలు చేసిన హోం మంత్రిపై సభా నియమాల కింద చర్యలు తీసుకోవాలని సిపిఎం రాష్ట్ర కార్యదర్శి పినరయి విజయన్‌ డిమాండ్‌ చేశారు. లతికకు క్షమాపణ చెప్పాలన్నారు. రాష్ట్రంలోని మహిళలందరినీ మంత్రి అవమానపర్చారని అన్నారు. లతికతోపాటు రాష్ట్రంలోని మహిళలందరికీ హోం మంత్రి క్షమాపణలు చెప్పాలని ప్రతిపక్ష నేత అచ్యుతానందన్‌ డిమాండ్‌ చేశారు. మంత్రి వ్యాఖ్యలకు వ్యతిరేకంగా కేరళ మహిళలు ముందుకొచ్చి నిరసన వ్యక్తం చేయాలని పిలుపునిచ్చారు. అన్నాడిఎంకె కేరళ విభాగం కూడా మంత్రి క్షమాపణలు చెప్పాలని డిమాండ్‌ చేశారు.