Posted: 12/25/2012 11:20 AM IST

క్రిస్మస్ పండుగను ప్రపంచంలోని క్రిస్టియన్స్ అందరు ఎంతో ఘనంగా జరుపుకుంటున్నారు. క్రిస్మస్ పండుగ యొక్క విశేషాలేంటో చూద్దాం. క్రైస్తవ మత స్థాపకుడు. మానవ ప్రేమను ప్రబోధించిన కరుణామయుడు . ఆ దేవుడి కుమారుడే లోకానికి రక్షకుడిగా ఇలలో వెలసిన ఈ పవిత్రమైన రోజును క్రిస్టియన్లు పండుగలా జరుపుకుంటారు. యేసుక్రీస్తు ఈ లోక ప్రజలకు పాప విముక్తి కలిగించడానికి దివి నుండి దిగివచ్చిన ప్రేమమూర్తి. లోకరక్షకుడైన ఆ యేసుక్రీస్తు జన్మదినమైన డిసెంబర్‌ 25ను ఎంతో పవిత్రంగా భావిస్తారు. సుమారు రెండు వేల సంవత్సరాల క్రింద బెత్లెహేము నగరంలో కన్నె మరియు, యోసే వులకు ముద్దుల బిడ్డగా ఒక పశువుల పాకలో జన్మించాడు యేసు. దేవదూతలు దిగివచ్చి అతని రాకను మానవాళికి తెలియజేశారు. అంతటి పవిత్రాత్మను స్మరించుకునే పండుగరోజు ఈ క్రిస్మస్‌. యేసుక్రీస్తు పుట్టిన తర్వాత ఆకాశంలో అతిపెద్ద నక్షత్రం వెలిసింది. ఇది మిగతా నక్షత్రాల కన్నా భిన్నంగా ఉంది. యేసు పుట్టి సమయంలో ప్రజలకు ఆ బాలుడి జన్మస్థానానికి దారి చూపిన ఆ తారకకు గుర్తుగా క్రిస్మస్‌ మాసం మొదలు కాగానే స్టార్‌ను ఇంటి ముందు పెట్టుకుని అలంకరించుకుంటారు.

‘క్రిస్మస్‌ ట్రీ’ని ప్రతిష్ఠించే వెనక ఆంతర్యం... మానవాళి పాపాలను పారద్రోలి పునీత ఛాయలనందించి సేదతీర్చే పవిత్ర వృక్షమే ఏసుక్రీస్తు అనే భావన. యేసుక్రీస్తు నీడలో మానవాళి ఆత్మ విశ్రాంతి పొందాలంటే సంకల్పమే ‘క్రిస్మస్‌ ట్రీ’ ఆచారంగా ఏర్పడింది. క్రిస్మస్‌ పండుగ అనగానే అందరికీ గుర్తొచ్చేది క్రిస్మస్‌ తాత... శాంటాక్లాజ్‌. ఎర్రని దుస్తులతో ఈ తాత తన బగ్గీపై మంచు కొండల మీదుగా ఆకాశమార్గాన వచ్చి క్రిస్మస్‌ చెట్టుకు వేలాడదీసిన మేజోళ్లలో పిల్లల కోసం ఎన్నో బహుమతులు పెట్టి వెళతాడంట. దీని వెనుక ఉండే ఉద్దేశమంతా ఒక్కటే. మానవుడిని, ప్రకృతిని సృష్టించిన దేవుడి ప్రేమ ను తెలుసుకోవడమే. సమస్త మానవాళి పాపపరిహారార్థం దేవుడు నరుడిగా జన్మించిన వవిత్రమైన రోజే క్రిస్మస్‌. యేసు అనగా గ్రీకుబాషలో రక్షకుడని, క్రీస్తు అనగా హెబ్రూ భాషలో అభిషిక్తుడని అర్థం. క్రీస్తు ప్రభువు జన్మించిన ఊరి పేరు బెత్లహేమ్‌. ఆ మాటకు అర్థం ‘రొట్టెల గృహం’.