Posted: 11/23/2012 03:02 PM IST

2014 ఎన్నికలే లక్ష్యంగా గెలుపు గుర్రాల వేటలో ఉన్న రాహుల్ టీం తమ పంథా మార్చింది. మొదటి రెండు జిల్లాల పర్యటనలో ఎదురైన చేదు అనుభవాలతో అలర్ట్ అయిన యువనేత బృందం అర్భాటాలకు పోకుండా గుట్టుగా  అభిప్రాయసేకరణ సాగిస్తోంది. ఖమ్మంలో పర్యటించిన నేతలు పార్లమెంట్ అభ్యర్థితో పాటు పార్టీ బలోపేతం కోసం తీసుకోవాల్సిన చర్యలపై  క్యాడర్ అభిప్రాయాలు తెలుసుకుంది. మహారాష్ట్ర ఎమ్మెల్యే ప్రశాంత్ ఠాకూర్ నాయకత్వంలోని రాహల్ టీం  ఖమ్మంలో పర్యటించి  పార్లమెంటు అభ్యర్దిత్వంపై కార్యకర్తల అభిప్రాయాలు సేకరించింది. మహబూబ్‌నగర్, నల్లగొండ జిల్లాలలో అభిప్రాయ సేకరణ సందర్బంగా జరిగిన గొడవలను దృష్టిలో ఉంచుకున్న టీం మెంబర్స్ ఖమ్మంలో మాత్రం అలాంటి వాటికి అవకాశం ఇవ్వకుండా జాగ్రత్త పడ్డారు.  అభిప్రాయ సేకరణ సిస్టంను పూర్తిగా మార్చేసి అంతా గుట్టుగా సాగిచ్చారు. నేతలెవరిని వివరాలు సేకరిస్తున్న  గదిలోకి అనుమతించలేదు. నల్గొండ, మహబూబ్ నగర్ జిల్లాలు మొత్తం చుట్టేసిన ప్రశాంత్ బృందం ఖమ్మంలో మాత్రం జిల్లా కేంద్రానికే  పరిమితమయ్యారు. అభిప్రాయాలు తీసుకోవాల్సిన వారి జాబితాను ముందే తయారుచేసుకుని వారి నుంచి కావలిసిన సమాచారాన్ని సేకరించింది.  ఖమ్మం పార్లమెంటు స్దానాన్ని కాంగ్రెస్ గెలుచుకోవాలంటే ఏం చేయాలి, జిల్లాలో పార్టీ పరిస్థితి ఎలా ఉందన్న దానిపై  కూపిలాగింది. అభిప్రాయ సేకరణలో భాగంగా ఎక్కువమంది అభ్యర్దిని మార్చాలని సూచించినట్టు  సమాచారం. కొత్త ఎంపీ అభ్యర్థులుగా పొంగులేటి సుధాకర రెడ్డి , సంభాని చంద్రశేఖర్,  భట్టి విక్కమార్క పేర్లు తెరపైకి వచ్చినట్టు తెలుస్తోంది.