Posted: 02/02/2012 02:48 PM IST

ఉపమింప మొదలు తియ్యన

కపటం బెడనెడను జెఱకు కైవిడినే పో

నెపములు వెదకును గడపట

గపటపు దుర్జాతి పొందు గదరా సుమతీ

ఉపమింప- పోల్చి చూసినట్లయితే, మొదలు తియ్యన- మొదట్లో తియ్యగానే ఉంటుంది, కపటపు- మోసం చేసే గుణం ఉన్న, ఎడనెడన్- పోనుపోను, చెఱకుకైవడిన్ ఏపో- చెరుకు గడలాగానే ఉంటుంది సుమా, నెపములు వెదకును- తప్పులు వెదుకటం జరుగుతుంది, కడపట- కాలం గడుస్తుంటే, దుర్జాతి పొందు- దుర్మార్గునితో సావాసం.

చెరుకు తినటం మొదలుపెట్టినప్పుడు చాలా తియ్యగా ఉంటుంది కానీ తినగా తినగా చప్పగా ఉండే పిప్పి మిగులుతుంది. మొసగాడు, దుర్మార్గుడు అయిన వాడితో స్నేహం చేస్తే ముందు బాగానే ఉంటుంది కానీ రాను రాను తప్పులు వెదకటంతో ఆ స్నేహం కాస్తా అంతరిస్తుంది.

స్నేహం చేసేటప్పడు జాగ్రత్త అని చెప్తున్నారు శతక కర్త. మీరు మంచి ఉద్దేశ్యంతోనే స్నేహం చెయ్యవచ్చు. మీది మంచి మనసు కాబట్టి స్నేహానికి విలువనిస్తూ స్నేహితుడిని పూర్తిగా నమ్ముతూ ఉండవచ్చు కానీ దుర్మార్గుడితో స్నేహం ముందు తియ్యగా ఉండి రానురాను అసలు స్వరూపం బయటపడుతుంది అని చెప్పటానికి చెరకు గడ పోలిక తీసుకున్నారు. ఈ కాలంలో బబల్ గమ్ పోలిక తీసుకోవచ్చు. బబల్ గమ్ నోట్లో పెట్టుకున్నప్పుడు తియ్యగా ఉంటుంది కానీ కాసేపటికి దాని పైపూతంతా పోయి చప్పటి గమ్ మిగులుతుంది. ఇది ఇంగ్లీష్ గమ్ అంటే జిగురు. హిందీలో గమ్ కూడా మిగులుతుంది. హిందీలో గమ్ అంటే దుఖ్ఖం.  

-శ్రీజ