ఇళ్లు కలసిరావడమంటే ఇదేగా.. గంటల వ్యవధిలో కోటీశ్వరులైన దంపతులు..

Posted: 09/08/2022 03:44 PM IST

Uk couple find gold coins worth rs 2 3 crore buried under their kitchen floor

ఆ దంపతులు దాదాపు 10 ఏళ్లుగా ఒకే ఇంట్లో నివాసముంటున్నారు. కాసింత డబ్బులు కూడబెట్టుకున్నారు. ఇకనేం కొత్తగా ఏమైనా చేయాలని భావించి.. అందుకు తగ్గట్టుగా కీలక నిర్ణయం తీసుకున్నారు. తాముంటున్న ఇంటి మరమ్మత్తు చేయాలన్నదే ఆ నిర్ణయం. అయితే ముందుగా వంటింటికి మరమ్మతు చేయాలని భావించారు. దశాబ్దాల కాలం నాటి ఇల్లు అందులోనూ.. ఏకంగా పదేళ్లుగా అక్కడే ఉంటున్నారు. దీంతో తాము కూడబెట్టుకున్న దాని నుంచి ఇంటి కోసం కాస్త వెచ్చిద్దామని భావించారు. ఇకనేం అనుకున్నదే తడవుగా ఇంటి మరమత్తు పనులను చేపట్టారు. అంతే ఆ ఒక్క నిర్ణయం వారిని కోటీశ్వరులను చేసింది.

అదెలా అంటే మరమ్మతులలో భాగంగా వంటింట్లో ఉన్న ఓ గోడను కూల్చారు. అంతే ఆ గోడలోంచి వచ్చిన నిధులు వారి జీవితాలలో అలుముకున్న చీకట్లు పారద్రోలి కాంతులను నింపేసింది. నిజంగా ఇళ్లు కలసిరావడం అంటే ఇది కాక మరేమిటీ.? దీంతో ప్రస్తుతం ఈ విషయం స్థానికంగా హాట్ టాపిక్‌గా మారింది. ఈ నేపథ్యంలో ఇందుకు సంబంధించిన పూర్తి వివరాల్లోకి వెళితే.. బ్రిటన్ కు చెందిన దంపతులు గత పదేళ్లుగా నార్త్ యార్క్‌షైర్ ప్రాంతంలోని ఓ ఇంట్లో కాపురం చేస్తున్నారు. ఏళ్లు గడవటంతో ఆ ఇల్లు ప్రస్తుతం పాతదైపోయింది. ఈ క్రమంలోనే ఆ దంపతులు కీలక నిర్ణయం తీసుకున్నారు. వంట గదిని కూల్చేసి.. సకల సౌకర్యాలతో తిరిగి నిర్మించాలని భావించారు.

ఈ నేపథ్యంలోనే కూల్చివేతను ప్రారంభించారు. గదిలోని ఓ గోడను బద్దలు కొడుతున్న సమయంలో కోట్ల విలువ చేసే బంగారు నాణేలతో కూడిన నిధి బయటపడింది. అది చూసి ఆ భార్యభర్తలు షాకయ్యారు. సుమారు 400ఏళ్లనాటి 264 బంగారు నాణేలను గుర్తించి తొలుత కంగుతిన్నారు. ఆ తర్వాత పట్టరాని సంతోషంతో ఎగిరి గంతేశారు. ఈ బంగారు నాణేలను వేలం ద్వారా విక్రయించాలని ఆ దంపతులు భావిస్తున్నారు. వాటిని విక్రయించడం ద్వారా సుమారు రూ.2.3 కోట్ల రూపాయలు పొందొచ్చని లెక్కలు వేస్తున్నారు. కాగా.. ఇంటి గోడలో నిధి బయటపడ్డ విషయం స్థానికంగా హాట్ టాపిక్‌గా మారింది.