ఇక ఆఫ్‌లైన్‌లో జీ-మెయిల్ చెక్ చేసుకోవ‌చ్చు.. ఎలాగో తెలుసా.!

Posted: 06/28/2022 03:39 PM IST

ఇప్పుడు ప్ర‌తి ఒక్క‌రూ ఇంట‌ర్నెట్‌తో అనుబంధం క‌లిగి ఉన్న‌వారే. నెటిజ‌న్లు.. ఐటీ, బిజినెస్ రంగాల్లో ప‌ని చేసేవారు త‌మ లావాదేవీల‌పై నిత్యం ఈ-మెయిల్స్‌లో స‌మాచార మార్పిడి చేస్తుంటారు. అందుకు ఇంట్లో ఇంట‌ర్నెట్ ఉండాల్సిందే. ఒక‌వేళ బ‌య‌ట‌కు వెళితే.. అక్క‌డ ఇంట‌ర్నెట్ ఉండ‌క‌పోవ‌చ్చు. అత్య‌వ‌స‌రంగా ఈ-మెయిల్ ఓపెన్ చేయాల్సి రావ‌చ్చు. ఒక్కోసారి ఈ-మెయిల్ చెక్ చేసుకుంటే బాగుండ‌న‌ని అనిపించ‌వ‌చ్చు. అటువంటి క‌ష్టాల‌కు ఇక గూగుల్ చ‌ర‌మ గీతం పాడనున్న‌ది. త‌న జీ-మెయిల్ యూజ‌ర్లకు ఆఫ్‌లైన్‌లోనూ సేవ‌ల‌ను వినియోగంలోకి తీసుకొచ్చింది.

అంటే ఇక ఇంట‌ర్నెట్ లేకుండానే ఆఫ్‌లైన్‌లోనే జీ-మెయిల్‌లో మెయిల్ చ‌దివి స‌మాధానం ఇవ్వ‌వ‌చ్చు. ఇంట‌ర్నెట్ క‌నెక్టివిటీ లేని మారుమూల ప్రాంతాల్లో జీ-మెయిల్ ఆఫ్‌లైన్ సేవ‌లు వాడుకోవ‌చ్చు. అయితే గూగుల్ క్రోమ్ బ్రౌజ‌ర్‌లోనే ఈ జీ-మెయిల్ ఆఫ్‌లైన్ సేవ‌లు ల‌భిస్తాయి. ఇన్‌కాగ్నిటో మోడ్‌లో ఆఫ్ లైన్ సేవ‌లు పొంద‌లేరు. ఆఫ్‌లైన్‌లో జీ-మెయిల్ సేవ‌లు ఎలా పొందాలో తెలుసుకుందామా..!ఇంట‌ర్నెట్ క‌నెక్ష‌న్ అందుబాటులో ఉన్న‌ప్పుడు క్రోమ్ బ్రౌజ‌ర్లో mail.google.com బుక్‌మార్క్ చేసుకోవాలి. త‌ర్వాత జీమెయిల్ ఓపెన్ చేసి సెట్టింగ్స్‌లోకి వెళ్లాలి. సీ ఆల్ సెట్టింగ్స్ అనే ఆప్ష‌న్ ఉంటుంది. అక్క‌డ ఆఫ్‌లైన్ ట్యాబ్ క్లిక్ చేయాలి. అప్పుడు ఎనేబుల్ ఆఫ్‌లైన్ మెయిల్ అనే ఆప్ష‌న్ క‌నిపిస్తుంది.

ఎనేబుల్ ఆఫ్‌లైన్ మెయిల్ ఆప్ష‌న్ సెల‌క్ట్ చేశాక ఆఫ్‌లైన్‌లో ఎన్ని రోజుల క్రితం ఈ-మెయిల్స్ స్టోర్ చేయాలో అడుగుతుంది. అందులో వారం, నెల‌, మూడు నెల‌ల ఆప్ష‌న్లుంటాయి. అందులో మీకు అవ‌స‌ర‌మైన ఆప్ష‌న్ సెలెక్ట్ చేసుకోవాలి. అటుపై సేవ్ చేంజెస్‌పై క్లిక్ చేస్తే స‌రి. జీ-మెయిల్ ఆఫ్‌లైన్ సేవ‌లు పొందొచ్చు. కొంత మంది జీమెయిల్ ఖాతాలో ఎనేబుల్ ఆఫ్‌లైన్ మెయిల్ ఆప్ష‌న్ స్థానే ఎండ్ స్పేస్ అనే మెసేజ్ వ‌స్తుంది. అటువంటి వారి జీ-మెయిల్ స్టోరేజీ కెపాసిటీ నిండిపోయింద‌ని అర్థం. అప్పుడు గూగుల్ ఖాతాలో అన‌వ‌స‌ర డేటా తొల‌గిస్తే ఆఫ్‌లైన్‌లో మెయిల్స్ స్టోర్ చేసుకునే వెసులుబాటు ల‌భిస్తుంది.