పంజాబ్ అప్ లో టికెట్ల రచ్చ.. ముష్టిఘాతాలకు దిగిన నేతలు

Posted: 01/07/2022 07:14 PM IST

పంజాబ్ ఆమ్ఆద్మీ పార్టీలో ఒక్క‌సారిగా విభేదాలు పొడ‌సూపాయి. ఎన్నికల రణక్షేత్రం అసన్నమైన తరుణంలో తమకు టికెట్లు కేటాయించకపోవడంతో విభేదాలు తలెత్తాయి. పార్టీ కోసం అహర్నిషలు కష్టపడుతున్న తమను పక్కనబెట్టడంపై అశావహులతో పాటు వారి అనుచరుణులు పార్టీ అధిష్టానంపై తిరగబడ్డారు. పార్టీ వ్యవస్థాపన నాటి నుంచి ఇంత కాలం పనిచేసిన తమకు కాకుండా ఇటీవల పార్టీలో చేరిన వారికి టికెట్లు కేటాయించడంపై అసంతృప్తితో రగలిపోయిన అశవహులు పంజాబ్ అప్ కన్వీనర్ రాఘవ్ చద్దాపై తిరుగుబాటు ఎగురవేశారు.

అంతా స‌వ్యంగానే న‌డుస్తుంద‌నుకుంటున్న స‌మ‌యంలో టిక్కెట్ల విష‌యంలో విభేదాలు భ‌గ్గుమ‌న్నాయి. శుక్ర‌వారం ఆప్ సీనియ‌ర్ నేత‌, పంజాబ్ ఎన్నిక‌ల కో ఇన్‌ఛార్జీ రాఘ‌వ్ చ‌ద్దా మీడియా స‌మావేశం నిర్వ‌హిస్తుండగా ఆగ్రహించిన అసంతృప్తి నేతలు కార్యాలయం బయటే ఆయనకు వ్యతిరేకంగా నినాదాలు చేశారు. అంతటితో ఆగకుండా ఒకానోక దశలో స‌మావేశ మధ్యలోనే మీడియా ప్రతినిధుల సమక్షంలోనే టిక్కెట్ల విష‌యంలో తీవ్ర అసంతృప్తికి లోనైన నేత‌లు ఒక్క‌సారిగా రెచ్చిపోయారు. రాఘ‌వ్ చ‌ద్దాను ఘెరావ్ చేసి తమ వ్యతిరేకతను చాటుకున్నారు.

దీంతో ఆయనతో పాటుగా వచ్చిన అప్ నేతలకు.. అసంతృప్తి నేతలకు మధ్య ఘర్షణకు ప్రెస్ క్ల‌బ్‌ వేదికగా మారింది. ఆమ్ఆద్మీ నేత‌లు ఒక‌రిపై ఒక‌రు ముష్ఠి ఘాతాల‌కు దిగారు. దీంతో అక్క‌డ ర‌ణ‌రంగంగా మారిపోయింది. ఆప్ సీనియ‌ర్ నేత‌లైన శివ‌ద‌యాల్ మాలీ, సంజీవ్ శ‌ర్మ‌, జోగింద‌ర్ పాల్ శ‌ర్మ మ‌ద్ద‌తు దారులు ఒక‌రిపై ఒక‌రు సంచ‌ల‌న ఆరోప‌ణ‌లు చేసుకున్నారు. స‌రిగ్గా ఎన్నిక‌ల స‌మ‌యంలో ఇత‌ర పార్టీల నుంచి ఆప్‌లో చేరిన వారికే ఎక్కువ ప్రాధాన్యం ల‌భిస్తోంద‌ని, వారినే అక్కున చేర్చుకుంటున్నార‌ని ఈ వ‌ర్గీయులు రాఘ‌వ్ చ‌ద్దాపై తీవ్రంగా విరుచుకుపడ్డారు.