అమెరికా గన్ కల్చర్: సహచరులపై కాల్పులు జరిపిన విద్యార్థి

Posted: 10/07/2021 11:29 AM IST

4 injured in shooting at timberview high school in arlington texas

అమెరికాలో తుపాకి సంస్కృతి నిట్టనిలువునా అమాయక దేశప్రజల ప్రాణాలను తీస్తోంది. ఈ విష సంస్కృతిపై ఆంక్షలు విధిస్తామని అంటూనే ఎప్పటికప్పుడు తాత్సారం చేస్తున్న ప్రభుత్వాలు.. అమాయకులను బలితీసుకుంటున్నాయి. అమెరికాలో నిత్యం ఏదో ఒక మూల ఈ విష సంస్కృతి తన ప్రతాపాన్ని చాటుతూనే వుంది. అధ్యక్షుడిగా బరాక్ ఒబామ ఉన్న హయాంలో ఈ విష సంస్కృతిపై చర్యలు తీసుకునేలా కొంత చర్చ జరిగినా.. ఇప్పటికీ ఆంక్షలు ఎక్కడ వేసిన గొంగలి అక్కడే అన్న చందంగా మారాయి.

తాజాగా విద్యార్థుల మధ్య చెలరేగిన ఘర్షణలోనూ కాల్పులకు కారణమైంది. టెక్సాస్ లోని అర్లింగ్టన్ లోగల పాఠశాలలో ఈ ఘటన చోటుచేసుకుంది. డాల్లస్ ఫోర్ట్ వర్త్ మెట్రోపాలెటిన్ ఏరియా పరిధిలోకి వచ్చే టింబర్ వ్యూ పాఠశాలలో విద్యార్థుల మధ్య ప్రారంభమైన ఘర్షణ తీవ్రస్థాయికి చేరుకుంది. దీంతో ఆగ్రహంతో ఊగిపోయిన 18 ఏళ్ల విద్యార్థి కాల్పులు ప్రారంభించగా భయంతో అందరూ పరుగందుకున్నారు. ఈ క్రమంలో నలుగురు గాయపడ్డారు. వీరిలో ఇద్దరికి తీవ్ర గాయాలు అయ్యాయి.

సమాచారమందుకున్న వెంటనే ఘటనా స్థలానికి చేరుకున్న పోలీసులు క్షతగాత్రులను ఆసుపత్రికి తరలించారు. కాల్పులు జరిపి పరారైన నిందితుడిని పోలీసులు అరెస్ట్ చేశారు. ఈ పాఠశాలలో మొత్తం 1900 మంది విద్యార్థులు చదువుకుంటున్నారు. కాల్పులు జరిపిన నిందితుడిని తిమోతీ జార్జ్ సింప్‌కిన్స్‌గా గుర్తించారు. అతడిపై మూడు అభియోగాలు నమోదు చేశారు. కాగా, తీవ్రంగా గాయపడిన వారిలో ఒకరి పరిస్థితి విషమంగా ఉన్నట్టు పోలీసులు తెలిపారు.