సహచర విద్యార్థులపై కాల్పులు జరపిన ఆరవ తరగతి విద్యార్థిని

Posted: 05/07/2021 11:29 PM IST

Sixth grade girl injures three people after opening fire with handgun

అగ్రరాజ్యం అమెరికాలో తుపాకీ సంస్కృతి నానాటికీ పేట్రేగిపోతున్నది. గన్ కల్చర్ తో అభంశుభం తెలియని అమాయక విద్యార్థులు కూడా ఉపాధ్యాయులను, తోటి విద్యార్థులపై తూటాలతో దాడి చేసి వారి ప్రాణాలు క్షణికావేశంలో తీసేశారు. ఇక మరికోందరిని గాయాలపాలు చేశారు. చిన్నారుల నుంచి మొదలుకుని పెద్దల వరకు అందరూ క్షణికావేశంలో ఆయుధాలను తీసుకువచ్చి కాల్పులు జరపడమే పరిష్కారంగా ఎంచుకుంటున్నారు. అగ్రరాజ్యంలో తుపాకీ సంస్కృతిని నియంత్రించాలని పాలకులు చేస్తున్న ప్రయత్నాలు ఇప్పటివరకు ఇంకా అచరణలో మాత్రం సాధ్యంకాలేదు. ఇలా ఈ సంస్కృతి నియంత్రణలో జరుగుతున్న కాలయాపన.. అగ్రరాజ్యవాసుల అసువులు తీస్తోంది.

తాజాగా అగ్రరాజ్యంలోని మరోమారు తరగతి గదిలో కాల్పుల మోత మ్రోగింది. ఆరో త‌ర‌గ‌తి విద్యార్థిని తాను చ‌దువుతోన్న‌ పాఠ‌శాల‌లో తుపాకీతో కాల్పులు జ‌రిపి అల‌జ‌డి రేపింది. అగ్రరాజ్యం అమెరికాలో ఈ ఘ‌ట‌న చోటు చేసుకుంది. ఎల్లో స్టోన్ జాతీయ పార్కుకు 95 మైళ్ల దూరంలోని ఇదాహో రాష్ట్రంలోని రిగ్బి అనే చిన్ననగరంలోని రిగ్బి మిడిల్ స్కూల్ లో ఆరో తరగతి చదువుతున్న ఓ బాలిక‌ బడికి వ‌చ్చే స‌మ‌యంలోనే ఓ తుపాకీని త‌న వెంట తెచ్చుకుంది. పాఠ‌శాల‌లో విచక్షణ రహితంగా కాల్పులకు తెగ‌బ‌డ‌డంతో ఇద్దరు విద్యార్థులు, స్కూల్ సిబ్బందికి ఒకరికి గాయాల‌య్యాయి.

దీంతో వారిని వెంట‌నే ఆసుప‌త్రికి త‌ర‌లించిన సిబ్బంది చికిత్స అందేలా చేయ‌డంతో ప్రాణాల‌తో బ‌య‌ట‌ప‌డ్డారు. వారు ముగ్గురూ కోలుకుంటున్నార‌ని వైద్యులు తెలిపారు. ఈ ఘటనపై కేసు నమోదు చేసుకున్న‌ పోలీసులు ద‌ర్యాప్తు కొన‌సాగిస్తున్నారు. కాల్పులు జ‌రిపిన బాలిక‌ను అదుపులోకి తీసుకున్నారు. అమెరికాలో తుపాకీ సంస్కృతి కార‌ణంగా త‌రుచూ కాల్పుల ఘ‌ట‌న‌లు చోటు చేసుకుంటున్నాయి. ఇప్పుడు పాఠ‌శాల‌లో చ‌దివే బాలిక‌ కూడా తుపాకీతో కాల్పులు జ‌ర‌ప‌డం క‌ల‌క‌లం రేపుతోంది.