వైవాహిక బంధాన్ని తెంచుకున్న బిల్ గేట్స్, మిలిందా.!

Posted: 05/04/2021 12:39 PM IST

మైక్రోసాఫ్ట్ అధినేత బిల్ గేట్స్ దంపతులు తమ దాంపత్య జీవితానికి స్వప్తి పలకనున్నారా.? అంటే గత రాత్రి వారు చేసిన ట్వీట్ మాత్రం అదే జరుగుతుందని స్పష్టం చేస్తోంది. వారు ప్రకటించిన నిర్ణయం ప్రపంచవ్యాప్తంగా తీవ్ర చర్చనీయాంశమైంది. తాను, మెలిందా ఇద్దరం విడాకులు తీసుకోబోతున్నట్టు అందులో పేర్కొన్నారు. అపర కుబేరులుగా వున్న ఆయనకు నుంచి అమె.. అమె నుంచి ఆయన విడాకులు తీసుకోవాలన్న నిర్ణయం వెనుక కారణాలను మాత్రం వారు స్పష్టం చేయలేదు. అయితే తీవ్ర మథనం తరువాత, అనేక పర్యాయాలు ఆలోచించి ఈ నిర్ణయం తీసుకున్నట్టు వారు తమ ట్వీట్ లో పేర్కొన్నారు.

తమ 27 ఏళ్ల వైవాహిక బంధానికి తాము ముగింపు పలకాలని నిర్ణయించుకున్నామని, ఈ కాలంలో ముగ్గురు అత్యద్భుతమైన పిల్లలను తీర్చిదిద్దామని పేర్కొన్నారు. తాము విడిపోయినప్పటికీ బిల్ మెలిందా గేట్స్ ఫౌండేషన్ ఎప్పటికీ కొనసాగుతుందని, ప్రపంచంలోని ప్రతి ఒక్కరు ఆరోగ్యంగా, నిర్మాణాత్మకంగా ఎదిగేలా తమ ఫౌండేషన్ కృషి చేస్తూనే ఉంటుందని స్పష్టం చేశారు. అయితే, భార్యాభర్తలుగా ఇక కొనసాగలేమని భావించిన తాము కొత్త ప్రపంచంలోకి వెళ్లేందుకు నిర్ణయించుకున్నామని, తమ నిర్ణయాన్ని, వ్యక్తిగత ఆకాంక్షలను గౌరవిస్తారని ఆశిస్తున్నట్టు గేట్స్, మెలిందాలు పేర్కొన్నారు.

pic.twitter.com/padmHSgWGc

— Bill Gates (@BillGates) May 3, 2021

బిల్ గేట్స్, మెలిందాలు 1994లో పెళ్లి చేసుకున్నారు. ప్రస్తుతం బిల్ గేట్స్ వయసు 65 సంవత్సరాలు. మెలిందా వయసు 56 సంవత్సరాలు. మైక్రోసాఫ్ట్ ‌లో మెలిందా ప్రొడక్షన్ మేనేజరుగా ఉన్నారు. ప్రపంచంలోని అత్యంత ధనవంతుల్లో ఒకరైన బిల్‌గేట్స్ ఆస్తి ఫిబ్రవరి నాటికి 137 బిలియన్ డాలర్లు. మెలిందాను వివాహం చేసుకున్న తర్వాత 2000వ సంవత్సరంలో బిల్ మెలిందా గేట్స్ ఫౌండేషన్ ను స్థాపించారు. ఇప్పటి వరకు ఈ సంస్థ ద్వారా 53 మిలియన్ డాలర్లను ధార్మిక కార్యక్రమాల కోసం వెచ్చించారు.