కరోనా వైరస్ అలెర్ట్: తిరుమల శ్రీవారి దర్శనం తాత్కాలిక నిలిపివేత

Posted: 03/19/2020 04:49 PM IST

కరోనా వైరస్ వ్యాప్తితో తిరుమలలో టీటీడీ చరిత్రలోనే సంచలన నిర్ణయం తీసుకుంది. తిరుమల శ్రీవారి దర్శనానికి వస్తున్న భక్తులపై టీటీడీ పాలకమండలి ఆంక్షలు విధించింది. ఇవాళ్టి నుంచి తిరుమల శ్రీవారి దర్శనాన్ని తాత్కాలికంగా నిలిపివేయనున్నారు. రేపటి నుంచి తిరుమలపై వున్న భక్తులందరినీ కొండ దిగువకు తిరుపతికి పంపించనున్నామని అధికారులు ఇప్పటికే ప్రకటించారు. తిరుమలకు చేరుకునే భక్తులను అలిపిరి నుంచే అధికారులు తిప్పి పంపిస్తున్నారు. తిరుమలకు చేరకునే అలిపిరి ఘాట్ రోడ్ మూసివేయాలని సిబ్బందికి అధికారులు ఆదేశించారు.

ఎగువ ఘాట్ రోడ్‌లో వాహన రాకపోకలు నిషేధించారు. ఇక తిరుమలకు చేరుకునే రెండు మెట్ల మార్గాలను కూడా అధికారులు మూసివేయించారు. తిరుమల కొండపై ఉన్న భక్తులను వెంటనే కిందకు వెళ్లిపోవాలని టీటీడీ అధికారులు ఆదేశాలు జారీ చేశారు. భక్తులు కిందికి వెళ్లేందుకు దిగువ ఘాట్ రోడ్ తెరిచి ఉంచింది. ఎక్కడిక్కడ వాహనాలను నిలిపివేశారు. శ్రీపాద మార్గం కూడా అధికారులు మూసివేశారు. కరోనా ఉధృతి నేపథ్యంలో టీటీడీ నుంచి అధికారిక ఉత్తర్వులు జారీ అయ్యే అవకాశం ఉంది. తిరుమలలో కరోనా అనుమానిత వ్యక్తిని గుర్తించారు. ఒక బృందంతో కలిసి కొండపైకి వచ్చినట్టు తెలుస్తోంది.

దివాకర్ అనే భక్తుడు వారణాసిలోని విశ్వానాదుడి దర్శనం చేసుకుని అక్కడి నుంచి తిరుమల కొండకు చేరుకున్నాడు. తిరుమలకు రాగానే అతడు తీవ్ర అస్వస్థతకు గురయ్యాడు. అతన్ని గుర్తించిన అధికారులు టీటీడీకి చెందిన ఆస్పత్రిలో ప్రాథమిక వైద్య పరీక్షలు నిర్వహించి తిరుపతిలోని సిమ్స్‌కు తరలించగా.. అక్కడి ఐసోలేషన్ వార్డులో బాధితుడికి వైద్యులు చికిత్సను అందిస్తున్నారు. కరోనా లక్షణాలతో బాధపడుతున్న వ్యక్తిని గుర్తించిన అనంతరం టీటీడీ వెంటనే ఆకస్మాత్తుగా ఎగువ ఘాట్ రోడ్డు మూసివేసింది. దీంతో ఆలయాన్ని కొన్ని రోజుల పాటు మూసివేయాలన్న నిర్ణయానికి టీటీడీ పాలకమండలి అధికారులు నిర్ణయానికి వచ్చారు. అత్యున్నత అధికారులంతా కూడా అత్యావసర సమావేశం నిర్వహించిన తరువాత ఈ మేరకు నిర్ణయం తీసుకున్నారు.