ప్రధాని సోదరుడి కుమార్తెపై ముసుగు దొంగల దాడి

Posted: 10/12/2019 07:50 PM IST

Pm modi s niece mugged in delhi robbed of cash phones

ఢిల్లీలో చైన్‌ స్నాచింగ్‌ ఘటనలకు అడ్డూ అదుపూ లేకుండా పోతోంది. బైక్ లపై వస్తున్న ముసుగు దొంగలు మహిళలు, యువతులను లక్ష్యంగా చేసుకొని చేతివాటం చూపుతున్నారు. చోరీలకు పాల్పడి క్షణాల్లో మాయమవుతున్నారు. తాజాగా ప్రధాని మోదీ సోదరుడి కుమార్తె దోపిడీ దొంగల బారిన పడ్డారు. దేశ రాజధాని ఢిల్లీలో నడిరోడ్డులో బైక్‌పై వచ్చిన ఓ స్నాచింగ్ ముఠా ఆమె చేతిలోని బ్యాగ్‌ను లాక్కెళ్లిపోయారు. అందులో విలువైన వస్తువులు, ముఖ్యమైన పత్రాలు ఉన్నట్లు ఆమె వెల్లడించారు.

సివిల్ లైన్ ఏరియా పోలీస్ స్టేషన్‌లో ఫిర్యాదు చేశారు. సాక్షాత్తూ దేశ ప్రధాని సోదరుడి కుమార్తెనే స్నాచర్ల బారిన పడటం చర్చనీయాంశంగా మారింది. ప్రధాని మోదీ సోదరుడి కుమార్తె అయిన దమయంతి మోదీ ఇటీవలే అమృత్‌సర్ నుంచి ఢిల్లీ వచ్చారు. స్థానిక సివిల్ లైన్ ప్రాంతంలోని గుజరాతీ సమాజ్‌ భవన్‌లో ఓ గది బుక్‌ చేసుకొని బస చేస్తున్నారు. ఆమె అహ్మదాబాద్ బయల్దేరి వెళ్లాల్సి ఉంది. ఈ క్రమంలో మధ్యాహ్నం ఆమె విమానాశ్రయానికి వెళ్లడానికి గది నుంచి బయటకు వచ్చారు.

తాను బస చేస్తున్న అపార్టుమెంట్ గేట్ ముందుకు రాగానే.. బైక్‌పై వచ్చిన ఇద్దరు దుండగులు క్షణాల్లో తన చేతిలోని హ్యాండ్ బ్యాగ్, వ్యాలెట్‌ను లాక్కొని పారిపోయారని దమయంతి తెలిపారు. దుండగులు ముసుగు వేసుకొని ఉన్నారని చెప్పారు. హ్యాండ్‌ బ్యాగులో రూ.56,000 నగదు, రెండు సెల్‌ ఫోన్‌లు, ముఖ్యమైన పత్రాలు ఉన్నాయని దమయంతి మోదీ వెల్లడించారు. ఇవాళ సాయంత్రం తాను విమానం ఎక్కాల్సి ఉందని.. కానీ, ముఖ్యమైన పత్రాలన్నీ ఆ బ్యాగ్‌లోను ఉండిపోయాయని ఆమె ఆవేదన వ్యక్తం చేశారు.

దమయంతి మోదీ ఫిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు. ప్రధాని మోదీ సోదరి కుమార్తె కావడంతో ఢిల్లీ పోలీసులు ఈ ఘటనపై ప్రత్యేకంగా దృష్టి సారించి విచారణ జరుపుతున్నారు. ఢిల్లీ ముఖ్యమంత్రి కేజ్రీవాల్‌ నివాసానికి కొద్ది కిలోమీటర్ల దూరంలోనే ఈ చోరీ జరగడం గమనార్హం. కాగా ఢిల్లీ శాంతిభద్రతలు క్షీణించాయని చెప్పడానికి ఇది నిదర్శనమని.. స్వయంగా ప్రదాని సోదరి కూతురికే ఇలాంటి ఘటన ఎదురుకావడంపై విపక్షాలు కేంద్రప్రభుత్వంపై విమర్శలు కురిపిస్తున్నారు.