బెదిరింపులు లక్ష్యపెట్టక.. జోధ్‌పూర్ కోర్టుకు బాలీవుడ్ నటుడు సల్మాన్ ఖాన్..

Posted: 09/27/2019 10:03 AM IST

కృష్ణ జింకలను వేటాడిన కేసులో ఆరోపణలు ఎదుర్కొంటున్న బాలీవుడ్ ప్రముఖ నటుడు సల్మాన్‌ఖాన్ విచారణ నిమిత్తం ఇశాళ జోధ్‌పూర్‌ కోర్టులో హాజరు కానున్నాడు. 21 ఏళ్ల క్రితం 1998లో ‘హమ్ సాథ్ సాథ్ హై’ షూటింగ్ సమయంలో సల్మాన్ ఖాన్.. తన తోటి నటీనటులు సైఫ్ అలీ ఖాన్, టబు, సోనాలి బింద్రే, నీలం కొఠారీలతో కలిసి రెండు కృష్ణ జింకలను వేటాడినట్టు సల్మాన్ ఖాన్ పై ఆరోపణలున్నాయి. ఈ విషయమై జోథ్‌పూర్ కోర్టు దర్యాప్తు చేస్తోంది. ఈ కేసు విచారణ నిమిత్తం సల్మాన్ ఖాన్ జోథ్‌పూర్‌ కోర్టుకు హాజరు కానున్నారు.

బాలీవుడ్ కండలవీరుడు సల్మాన్ న్యాయస్థానానికి వస్తున్నరన్న వార్త  నేపథ్యంలో ఆయన అభిమానుకలు కూడా పెద్ద సంఖ్యలో న్యాయస్థానానికి వచ్చే అవకాశాలు వున్నాయి. దీంతో కోర్టు పరిసరాల్లో పోలీసులు భారీ బందోబస్తు ఏర్పాటు చేశారు. ఈ కేసును విచారించిన న్యాయస్థానం సల్మాన్ ఖాన్ ను దోషిగా తేల్చి ఐదేళ్ల జైలు శిక్ష విధించింది. సల్మాన్ ప్రస్తుతం బెయిలుపై ఉన్నాడు. కోర్టుకు హాజరు కాకుంటే బెయిలు రద్దు చేస్తామని కోర్టు హెచ్చరించిన నేపథ్యంలో సల్మాన్ ఇవాళ జోధ్‌పూర్ న్యాయస్థానంలో హాజరుకానున్నాడు.

కాగా, జోధ్‌పూర్ న్యాయస్థానానికి హాజరయితే హతమారుస్తామంటూ బాలీవుడ్ నటుడికి బెదిరింపులు కూడా వచ్చాయి. గ్యారీ షూటర్ పేరిట ఫేస్ బుక్ లో హెచ్చరిక పోస్టులు కనిపించడంతో పోలీసులు అప్రమత్తం అయ్యారు. సల్మాన్ ఖాన్ కోర్టుకు రానున్న నేపథ్యంలో ఆయనకు కట్టుదిట్టమైన భద్రతను కల్పించనున్నారు. న్యాయస్థానం అవరణలోనూ మరింత భద్రత పెంచారు. సల్మాన్ ఫొటోకు రెడ్‌క్రాస్ మార్కు చేసి ‘007 లారెన్స్ బిష్ణోయ్’ ముఠా ఈ హెచ్చరికలు జారీ చేయడంతో పోలీసులు అలర్ట్ అయ్యారు. ఈ పోస్టుపై దర్యాప్తు చేస్తున్నట్టు  రాజస్థాన్ పోలీసులు తెలిపారు.