చిత్తూరు మాజీ ఎంపీ శివప్రసాద్ అరోగ్యం విషమం

Posted: 09/19/2019 06:34 PM IST

సినీ నటుడు, మాజీ ఎంపీ శివప్రసాద్‌ తీవ్ర అస్వస్థతకు గురయ్యారు. వెన్నునొప్పి, కిడ్నీ సంబంధిత వ్యాధితో బాధపడుతున్న ఆయనకు చెన్నై అపోలో ఆస్పత్రిలో డాక్టర్లు వైద్యం అందిస్తున్నారు. శివప్రసాద్ ఆరోగ్యం విషమంగా ఉన్నట్లు తెలుస్తోంది. అనారోగ్యంతో తిరుపతి స్విమ్స్‌లో చికిత్సపొందుతున్న ఆయన తీవ్ర అస్వస్థతకు గురి కావడంతో కొద్దిరోజుల క్రితం చెన్నై అపోలో ఆస్పత్రికి తరలించిన సంగతి తెలిసిందే. శివప్రసాద్ ఆరోగ్యంపై టీడీపీ అధినేత చంద్రబాబుతో పాటు పలువురు పార్టీ నేతలు కూడా ఆరా తీశారు.

శివప్రసాద్ కుటుంబ సభ్యులను ఆయన అరోగ్యపరిస్తితి గురించి అడిగి తెలుసుకున్నారు. ఆయనకు అందుతున్న వైద్యం గురించి కూడా చంద్రబాబు అరా తీశారు. శివప్రసాద్ త్వరలోనే కొలుకుంటారని కుటుంబ సభ్యులకు ధైర్యం చెప్పారు. అయితే రెండు రోజులుగా శివప్రసాద్ ఆరోగ్యం క్షీణించినట్లు తెలుస్తోంది. చెన్నై అపోలో ఆస్పత్రిలో ఆయనకు వైద్యం కొనసాగుతోంది. శివప్రసాద్ 2009లో టీడీపీ తరపున చిత్తూరు ఎంపీగా పోటీ చేసి గెలిచారు. తర్వాత 2014 ఎన్నికల్లోనూ ఘన విజయం సాధించారు.

ఇటీవల జరిగిన సార్వత్రిక ఎన్నికల్లో వైఎస్సార్‌సీపీ అభ్యర్థి రెడ్డప్ప చేతిలో ఓడిపోయారు. తర్వాత ఆరోగ్యం సహకరించకపోవడంతో కొద్దిరోజులుగా ఆయన పార్టీ కార్యక్రమాలకు కూడా దూరంగా ఉంటున్నారు. శివప్రసాద్ రాజకీయ రంగం మాత్రమే కాదు.. సినిమాల్లోనూ రాణిస్తున్నారు. ఆయన ఎన్నో సినిమాల్లో నటించారు. విభజన, ప్రత్యేక హోదా ఉద్యమాల్లో శివప్రసాద్ తన వేషాలతో వెరైటీగా నిరసన తెలియజేశారు. హోదా హామీని నెరవేర్చాలంటూ పార్లమెంట్ ముందు వెరైటీ వేషధారణల్లో ఆందోళనలు చేసి అందరి దృష్టిని ఆకర్షించారు.