బ్యూటీషియన్ జ్యోతి, సందీఫ్ ల మధ్య మూడేళ్లుగా ప్రేమ వ్యవహారం..

Posted: 04/17/2018 03:03 PM IST

వికారాబాద్ ప్రాంతంలో అనుమానాస్పద పరిస్థితుల్లో విఘతజీవిలా పడివున్న బ్యూటీషియన్ జ్యోతి కేసులో అనేక అనుమానాలు వెంటాడుతున్నాయి. నిన్నటి వరకు పోలీసులు అమె మైలారం రైల్వే స్టేషన్ వద్ద కిందకు దిగేందుకు యత్నించి.. పడిపోయిందని చెప్పినా.. అమె అనుమానాస్పద మరణంలో మాత్రం అనేక సందేహాలు వెన్నాడుతున్నాయి. హైదరాబాద్ నగరంలోని లింగంపల్లిలో గ్రీన్ ట్రెండ్స్‌లో బ్యూటీషియన్‌ గా పనిచేస్తున్న జ్యోతి.. అమ్మమ్మ ఇంటికని బయలుదేరి మార్గమధ్యంలో శవమై కనిపించడం వెనుక కారణాలను అన్వేషిస్తున్న పోలీసులు చిక్కుముడిని విప్పే ప్రయత్నాల్లో నిమగ్నమయ్యారు.

కేసు దర్యాప్తులో పోలీసులు మరికొన్ని విషయాలను తెలుసుకున్నారు. బ్యూటీషియన్‌ జ్యోతి.. సందీప్ అనే యువకుడితో గత మూడేళ్లుగా ప్రేమ వ్యవహరం నడుస్తుందని గుర్తించారు పోలీసులు. ఈ క్రమంలో జ్యోతి మృతిచెందిన ప్రాంతానికి వచ్చిన సందీప్ అప్పటినుంచి కనిపించకుండా పోవడంతో పోలీసులు అతని కోసం వెతుకుతున్నారు. అంతేగాక సందీప్ సెల్‌ఫోన్ స్విచ్చాఫ్ కూడా రావడంతో పోలీసులు అతనిపై అనుమానం వ్యక్తం చేస్తున్నారు. జ్యోతిని ప్రేమించిన సందీప్ ఎందుకు కనిపించకుండా పోయాడన్న విషయాన్ని పోలీసులు ట్రేస్ చేసే పనిలో వున్నారు.

ప్రేమించడం ఓకే కానీ పెళ్లి వరకు అది దారితీయడం ఇష్టం లేక.. తాండూరు వెళ్తున్న సమాచారంతో సందీప్ జ్యోతిని అంతమొందించాడా..? లేక ఇద్దరు కలసి వెళ్తుండగా, అనుకోని పరిస్థితుల్లో ఈ ప్రమాదం సంభవించిందా.? లేక జ్యోతికి వారింట్లో పెద్దలు మరో పెళ్లికి సిద్దం చేస్తున్నారా..? ఇది ఇష్టంలేక సందీప్ అమెపై పగతీర్చుకున్నాడా.? వంటి అనుమానాలు రెకెత్తుతున్నాయి. జ్యోతి ప్రేమికుడు సందీప్ అచూకీ లభ్యమయితే కానీ.. కేసు దర్యాప్తు కొలిక్కి చేరే అవకాశం లేదని తెలుస్తోంది.ఇదిలా ఉండగా వికారాబాద్‌ ఆస్పత్రిలో జ్యోతి మృతదేహానికి మంగళవారం పోస్టుమార్టం నిర్వహించారు. తలకు బలమైన గాయం కావడంతో ఆమె మృతిచెందినట్లు గుర్తించారు.