మూడు రోజుల్లో స్పష్టత వచ్చేనా?

Posted: 03/06/2018 09:24 AM IST

ఆంధ్ర ప్రదేశ్ ప్రత్యేక హోదా విషయంలో మూడు రోజుల్లో స్పష్టత వస్తుందని బీజేపీ ఏపీ అధ్యక్షుడు కంభంపాటి హరిబాబు పేర్కొన్నారు. సోమవారం కేంద్ర ఆర్థిక శాఖ మంత్రి అరుణ్ జైట్లీతో టీడీపీ నేతలు ఢిల్లీలో చర్చించిన విషయం తెలిసిందే. ఈ భేటీలో బీజేపీ ఏపీ అధ్యక్షుడు కంభంపాటి హరిబాబు కూడా పాల్గొన్నారు. ప్రత్యేక హోదా, నిధుల అంశాలపైనే ప్రధానంగా చర్చ సాగినట్లు తెలుస్తోంది.

ఇక భేటీ ముగిసిన అనంతరం ఆయన మీడియాతో మాట్లాడుతూ... విభజన హామీలు, చట్టంలో పొందుపరిచిన అంశాలపై తాము జైట్లీతో చర్చించామని అన్నారు. ఆర్థికపరమైన అంశాలపై కూడా చర్చ జరిగిందని అన్నారు. ప్రత్యేక హోదాకు సమానమైన ప్రయోజనాలను రాష్ట్రానికి ఇవ్వాలని కోరామని కంభంపాటి హరిబాబు వ్యాఖ్యానించారు.

నిధులు ఇచ్చే విషయంలో ఆలస్యం జరుగుతుందన్న భావన ఉందని, ఆర్థికలోటు భర్తీ అంశంపై చర్చలు జరుగుతున్నాయని, మరో రెండు, మూడు రోజుల్లో స్పష్టత వస్తుందని తెలిపారు. మరోవైపు టీడీపీ ఎంపీలు మాత్రం ఈ చర్చల తర్వాత కూడా అసంతృప్తిగానే కనిపించటం విశేషం.