మంత్రి జోగు రామన్నకు తృటిలో తప్పిన ముప్పు..

Posted: 02/17/2018 02:14 PM IST

తెలంగాణ అటవీ శాఖ మంత్రి జోగు రామన్న తృటిలో ప్రాణాపాయం నుంచి తప్పించుకున్నారు. ఆయనతో పాటు వున్న ఎమ్మెల్యే దివాకర్‌రావుకు కూడా ముప్పు తప్పింది. సెక్యూరిటీ సిబ్బంది సకాలంలో స్పందించడంతో వారికి ఎలాంటి ప్రాణాపాయం బారిన పడకుండా పక్కకు తీసుకురాగలిగారు. వివరాల్లోకి వెళ్తే.. మంచిర్యాల జిల్లా కేంద్రానికి సమీపంలో బిసి సంక్షేమ హాస్టల్ భవన నిర్మాణానికి మంత్రి జోగు రామన్న, ఎమ్మెల్యే దివాకర్‌రావు భూమి పూజ చేశారు.

దీంతో మంత్రి తమ గ్రామానికి వచ్చి అభివృద్ది కార్యక్రమాలను చేపట్టడంతో అనందంతో సంబరంగా వున్న టీఆర్ఎస్ కార్యకర్తలు పటాసలు పేల్చారు. ఇంతలో మంత్రి అక్కడి నుంచి పక్కనే ఏర్పాటు చేసిన బహిరంగ సభ వద్దకు చేరుకుని అక్కడ సభికులను ఉద్దేశించి ప్రసంగిస్తున్న క్రమంలో మరోమారు కార్యకర్తలు పటాసులు పేల్చారు. అయితే టపాసులు మరీ ముఖ్యంగా తారాజువ్వలు రివ్వును ఎగిరి గాల్లోకి వెళ్లి పేలిపోయాయి. అయితే వాటికి ఇంకా నిప్పు వుండటంతో అవి ఏకంగా బహిరంగ సభావేదికలోని టెంట్లపై పడ్డాయి.

దీంతో అకస్మాత్తుగా మంటలు వ్యాపించాయి. మంటలను చూసిన అహుతులు టెంట్ కింద నుంచి బయటకు పరుగులు తీశారు. ఏం జరుగుతుందని మంత్రి, ఎమ్మెల్యే అశ్చర్యంగా చూస్తున్నంతలో మంటలు తీవ్రస్థాయికి చేరాయి. దీంతో హుటాహుటిన అప్రమత్తమైన సెక్యూరిటీ సిబ్బంది మంత్రి రామన్నతో పాటు ఎమ్మెల్యేను సురక్షితంగా బయటకు తీసుకెళ్లారు. కాగా, ఇది టపాసుల వల్ల కాదు విద్యుద్ఘాతంలో షామియానాకు మంటలు అంటుకున్నాయని టీఆర్ఎస్ నేతలు చెబుతున్నారు. కాగా షామియానా, వేదిక, కుర్చీలు పూర్తిగా దగ్ధమయ్యాయి. మంత్రి, ఎమ్మెల్యే సురక్షితంగా బయటపడటంతో కార్యకర్తలు, పోలీసులు ఊపిరి పీల్చుకున్నారు.