ITEMVIDEOS: పిల్లాడి తలకు తుపాకీ పెట్టి దోపిడి. ఏటీయం కేంద్రంలోనే..

Posted: 01/31/2018 06:33 PM IST

Masked man holds child at gunpoint robs couple inside pnb atm

ఈ మధ్యకాలంలో దొంగలు మరీ పేట్రేగిపోతున్నారు. కొత్త కొత్త మార్గాలను ఎంచుకుని మరీ దోపిడీలకు పాల్పడుతున్నారు. సాధారణంగా దారిదోపిడీలు, ఇంటి తాళాలు పగులగొట్టి దోపిడిల నుంచి చైన్ స్నాచింగ్ లు, బ్యాంకుల వద్ద మాటు వేసి క్యాష్ బ్యాగ్ లాక్కుని వెళ్లే ఘటనలు మాత్రమే చూసిన ప్రజలకు.. ఏటీయం కేంద్రాల వద్ద మాటు వేసి దొపిడీలు కూడా ఈ మధ్యకాలంలో చూశారు.

అయితే మధ్యప్రదేశ్ లో ఇంకొత్త తరహాలో దోపిడీ జరిగింది. డబ్బులు డ్రా చేసేందుకు వెళ్లిన ఓ కుటుంబానికి చేదు అనుభవం ఎదురైంది. జనవరి 24న జరిగిన ఈ ఘటన ఆలస్యంగా వెలుగులోకి వచ్చింది. మధ్యప్రదేశ్ ఇండోర్ లో ఓ భర్త తన భార్య, చిన్నారితో కలసి రాత్రి 8:30 గంటల సమయంలో పంజాబ్ నేషనల్ బ్యాంక్ ఏటీయంకు వెళ్లి డబ్బు డ్రా చేశారు. వాళ్లను గమనించిన ఓ ముసుగు వేసుకున్న ఓ వ్యక్తి కూడా ఏటీఎంలోకి ప్రవేశించాడు. అదను చూసి వారిని తుపాకీతో బెదిరించాడు.

ఈ హఠాన్పరిణామం చూసి బెదిరిపోయిన భార్యభర్తలు అందోళనకు గురయ్యారు. దీంతో భర్త తన చేతిలోని డబ్బు తీసి ఇచ్చినా వదల్లేదు. చిన్నారి తలకి తుపాకీ గురిపెట్టి.. ఏటీయం నుంచి డబ్బులు తీసి ఇవ్వాలని ఒత్తిడి చేశాడు. దీంతో ఏం చేయాలో తెలియక ఆ వ్యక్తి ఏటీఎం నుంచి డబ్బులను డ్రా చేసి మరీ ఆ దుండగుడికి ఇచ్చాడు. డబ్బులు తీసుకుని ఆ దుండగుడు పరారయ్యాడు. ఈ ఘటనంతా ఏటీయంలోని సీసీటీవీ కెమెరాలో రికార్డయింది. వీడియో ఆధారంగా పోలీసులు కేసు నమోదు చేసుకుని దర్యాప్తు చేస్తున్నారు.