బాలికలను లైంగికంగా వేధిస్తే.. ఇక మరణశిక్షే..

Posted: 11/27/2017 10:49 AM IST

దేశరాజధాని ఢిల్లీలో నిర్భయ ఘటన యావత్దేశంలో సంచలనంగా మారి మహిళలపై జరిగే అత్యాచారాలను త్వరితగతిన పరిష్కారించేందుకు ఫాస్ట్ ట్రాక్ కోర్టులను తీసుకువచ్చిన విషయం తెలిసిందే. అయినా దేశంలో అబలలపై అఘాయిత్యాలకు అడ్డకుట్టపడలేదు. ఈ తరహా నేరాలు ఉత్తారిధి రాష్ట్రాల్లోనే పెద్దఎత్తున్న నమోదవుతున్నాయి. ఇక జాతీయ నేరాల రికార్డుల బ్యూరో గణంకాల ప్రకారం మహిళలు, బాలికలపై దేశంలో పెద్దఎత్తున్న అఘాయిత్యాలు జరిగే రాష్ట్రంలో మధ్యప్రదేశ్ మొదటి స్థానంలో వుంది. దీంతో ఆ ప్రభుత్వం తీరుపై విమర్శలు వెల్లువెత్తుతున్నాయి.  

మధ్యప్రదేశ్ ప్రభుత్వం మహిళలపై అత్యాచారాలు, లైంగిక వేధింపులను అడ్డుకట్ట వేసేందుకు మరో అడుగు ముందుకేసింది. ఈ తరహా నేరాలకు పాల్పడుతున్న వారిపై కఠిన నిర్ణయానికి ఉపక్రమించింది. రాష్ట్రంలో మహిళలకు కనీస భద్రత కరువైందని విపక్షాలు విమర్శలు గుప్పిస్తుండడంతో ప్రభుత్వం సంచలన నిర్ణయం తీసుకుంది. 12 ఏళ్ల కంటే తక్కువ వయసున్న బాలికలపై అఘాయిత్యాలకు పాల్పడే నిందితులకు మరణ శిక్ష విధించాలన్న తీర్మానానికి ఆ రాష్ట్ర కేబినెట్ ఆమోదం తెలిపింది.

మహిళలపై సామూహిక అత్యాచారం చేసే నిందితులకు కూడా మరణ శిక్ష విధించేందుకు గ్రీన్ సిగ్నల్ ఇచ్చింది. అత్యాచారం రుజువైన పక్షంలో నిందితులకు విధించే శిక్ష, జరిమానా మొత్తాన్ని పెంచేందుకు సైతం శిక్షా స్మృతిని సవరించేందుకు సైతం అంగీకారం తెలిపింది. ఇక.. మహిళలపై అత్యాచారయత్నం చేసినా, వెంటపడి వేధించినా రూ.లక్ష జరిమానా విధించాలని నిర్ణయించింది. ఇందుకు సంబంధించి ఈ శీతాకాల సమావేశాల్లో శాసనసభలో బిల్లు ప్రవేశపెడతామని ఆర్థిక మంత్రి జయంత్‌ తెలిపారు.